PN Sei Halo Lelaun Ba Kareta Prado

DILI, STLNEWS.co – Deputadu sira iha Parlamentu Nasional (PN) sei halo lelaun ba kareta prado iha terseiru lejislatura nia, neebe durante nee sira uza ba mai.

Kestaun nee hatoo husi Prezidente Parlamentu Nasional Aniceto Guterres ba jornalista sira, bainhira remata hasoru malu ho Prezidente Republika Jose Ramos Horta iha Palasiu Prezidente Bairu Pite, Sesta nee (26/05/2023).

“Se kareta besi tuan ona, duke gasta osan barak atu halo manutensaun, neebe lo-loos osan nee sosa fali kareta foun. Entaun halo lelaun nee baibain, jestaun nee bolu jestaun ba patrimoniu estadu, bainhira halo jestaun laos ita atu lakon, halo jestaun atu sasan sira nee laos tenki lori benefisiu no laos ita gasta osan barak liu tan,” dehan nia.

Prezidente Parlamentu hatete, kareta sira nee presiza halo lelaun tanba tinan 12 nia laran ona mak deputadu sira uza hodi halo servisu, tanba nee merese halo lelaun duke uza osan barak hodi halo manutensaun.

“Bainhira kareta tuan ona ho tinan 12, enkuantu uza karreta sira privadu sira saida, imi haree deit kondisaun kareta estadu sira terseira lejistura nee, uma forma halo jestaun ba patrimoniu estadu. Laos tanba atu sosa kareta estadu, sosa ka la sosa nee orsida lejistura mai mak desidi,” katak nia.

Nia hatutan, iha loron kinta nee sira halo reuniaun hodi halo lelaun kareta tuan, laos sosa kareta foun.

“Horiseik ami la koalia konaba sosa kareta foun, se ita bo’ot sira rona informasaun atu sosa kareta karik, nee ita boot sira rona informasaun sala ka ema ruma hakarak halo hoax nee la loos, ami la koalia sosa kareta foun, ami koalia konaba alinasaun kareta antigu terseira lejistura nian. Tanba besi tua hotu ona, se atu sosa kareta foun nee laos lejistura ida nee nia kompetensia, husik deputadu sira tuir mai mak sira desidi, nee hanesan halo jestaun ba patrimoniu estadu,” katak nia.

Iha biban nee, nia mos haktuir, funsionamentu Parlamentu Nasional so parlamentu mak bele foti desizaun.

“Iha interpretasaun barak, hau hanoin interpretasaun ikus nee so Parlamentu Nasional nee mak hola desizaun, se mak hola desizaun nee plenaria Parlamentu Nasional, laos Prezidente Parlamentu Nasional. Maibe tranzisaun halo nusa mak iha 14 Junhu nee idak-idak nia interpretasaun,” katak nia.

Nunee mos Diretor Ajar Jose Luis Oliveira konsidera ida nee deputadu sira hatudu hahalok neebe mak kanten.

“Nee lamenta, deputadu sira nia atitude nee hanesan los ema sira naok ten sira nee, mandatu atu hotu ona buka foti kareta estadu nia, la preokupa katak estadu nia kapasidade finanseiru nee iha hela risku nia laran, risku nia laran tanba ita depedente ba fundu minarai, no fundu minarai komesa menus, ita nia reseita alternativu laiha, agora deputadu sira ba koru tan osan estadu ho patrimonia estadu,” katak nia.

Nia hatutan, kareta sira nee nia kondisaun sei diak, tuir lo-loos fo mos ba instituisaun seluk bele halo servisu hodi servi povu.

“Nee lamenta tebes, atitude sira nee la refleta sira nia posizaun lider estadu neebe ke laiha patriotizmu, la hadomi nasaun nee,” katak nia.

Nia haktuir, se dehan kareta aat diak liu entrega ba diresaun patrimoniu estadu mak sira halo jestaun, labele deputadu sira mak halo lelaun rasik, se sira mak lelaun rasik nee viola lei neebe regula alinamentu patrimoniu estadu, tanba nee kareta estadu sosa ho osan povu nia, tanba nee tenki submete ba rejime neebe iha, oinsa halo alinamentu ba patrimoniu estadu, laos sira mak desidi rasik. “se sira sosa ho sira nia osan rasik laiha buat ida, maibe nee sosa ho osan povu nia,” katak nia.

Nunee mos Akademista Lazaro Fernandes afirma, deputadu sira labele hanoin deit ba sira nia aan, maibe presiza mos hanoin ba futuru, tanba oras nee osan minarai atu hotu ona.

“Buat hotu hanoin ba osan minarai, ita hatene katak osan minarai besik hotu ona, tanba saida kareta sira nee ho kondisaun diak nusa la uza, tenki lelaun tiha, depois halo tan lei hodi aprova osan husi sosa foun, ida nee la justu,” katak nia.

Nia hatutan, se deputadu no deputada sira reprezenta povu diak liu hanoin mos povu nia moris, labele hanoin ba aan deit.

(eme)

LEAVE A REPLY

Please enter your comment!
Please enter your name here