DILI, STLNEWS.co – Bankada opozisaun nuudar reprezentante povu iha uma fukun Parlamentu Nasional (PN) lamenta ho bankada governu neebe husu Ministeriu Solidaridade Sosial no Inkluzaun (MSSI) atu hapara subsidiu ba idozu.
Visi Prezidente Bankada CNRT, Deputadu Patrocino Fernandes hatete, FRETILIN dezde prinsipiu kedas sira kontra subsidiu ba idozu nee, tanba subsidiu ba idozu introdus iha kuartu governu konstituisional neebe CNRT nia aliadu sira mak lidera hodi introdus subsidiu ba idozu, tanba durante tinan 5 nia laran FRETILIN vota kontra hotu Orsamentu Jeral Estadu (OJE) iha PN, inklui subsidiu ba idozu sira nian iha duni plenaria laran, sira kontra abertamente subsidiu ba idozu nian.
“Entaun ida nee hau bele dehan FRETILIN konsistente atu kontra, no la valoriza idozu sira liu-liu inan aman sira neebe ferik katuas ona hodi sakrifika sira nia vida tomak iha funu nia laran too hetan ita ukun aan, estadu labele rekonhese netik sira ho subsidiu ida neebe ho valor hahu husi US$ 30 foin mak sae ba US$ 50, no ita la hatene valor ida nee bele koresponde ba saida,” dehan nia ba STL iha PN, Kinta (16/03/2023).
Nia afirma, maibe subsidiu ida nee hanesan jestu ida husi estadu atu bele rekonhese netik ferik-katuas sira neebe durante iha funu laran sakrifika ona sira nia vida tomak, moris iha situasaun neebe difisil, tanba sira laiha tan ona tempu atu estadu labele entrega ba sira sai empregador ruma ka trabalhador ruma atu bele hetan osan.
Nia tenik, maski bankada governu dehan nee laos subsidiu permanente, nee sim, tanba naran subsidiu nee laos permanente, maibe ohin loron estadu seidauk tama los iha krizi ida neebe atu labele los ona atu valoriza ferik ho katuas sira.
Iha fatin ketak, Prezidente Komisaun B neebe trata asuntu Defeza no Seguransa, Agostinho Siquera Somotxo hatete, laos husu atu hapara subsidiu ba idozu sira, maibe husu ba governu subsidiu nee bainhira mak bele termina, tanba subsidiu refere laos direitu ida, maibe nee estadu mak hasai osan husi bolsu hodi fo subsidiu ida nee.
(dom)
