DILI, STLNEWS.co – Relasiona ho deklarasaun Lider Nasional Kay Rala Xanana Gusmao katak, bainhira CNRT kaer Governu da-9 sei halo auditoria ba iha fundu sesta bazika, maibe Bankada KHUNTO iha uma fukun Parlamentu Nasional (PN) konsidera hanesan politika bele koalia, maibe labele halo auditoria fila fali ba iha povu rasik.
Tuir Deputadu Bankada KHUNTO Luis Roberto dehan, relasiona ho sesta bazika neebe Governu da-8 halo hela hodi distribui ba iha benefisiáriu sira, tuir PN nia observasaun karik iha distribuisaun laran iha sidadaun balun mak seidauk hetan sesta bazika, maski halo ona reklamasaun ba governu oinsa atu bele responde hotu.
“Politika ita bele koalia, maibe ita labele halo auditoria fila fali ba iha povu nee, lejitimidade mai husi povu, lideransa ida neebe atu ukun mos labele halo fila fali auditoria ba iha povu rasik, tanba distribuisaun ai haan ho US$ 200 neebe governu halo ba ita nia populasaun nee laos krimi boot ida hodi halo auditoria ba iha ida nee,” dehan nia ba STL iha PN, Segunda nee (17/04/2023).
Nia tenik, maibe importante mak governu bele hakbiit komunidade sira ninia forsa ka iis, ida nee mos bele dehan katak responde ba komunidade nia nesesidade nee lae, mais atu hakbiit ka haforsa deit, oinsa ba futuru lideransa sira bele hadia diak liu tan.
Nia afirma, laos estadu ka governu ida sae ba atu halo julga malu fali, tanba auditoria ba malu nee signifika halo auditoria ba komunidade ka populasaun rasik.
(dom)
