DILI, STLNEWS.co – Situasaun rai laran lao ladun estavel, tanba dala barak viola Konstituisaun Republika Demokratika Timor Leste (K-RDTL).
“Ita nia situasaun politika iha rai laran durante nee lao ladun estavel, tanba ita rasik viola K-RDTL, tanba nee estabilidade politika iha rai laran atu lao diak iha futuru mai, governu foun mai labele viola konstituisaun,” kestaun nee fo sai husi Deputada Carmelita Moniz ba STL iha Parlamentu Nasional, Sesta nee (31/03/2023).
Nia afirma, politika rai laran lao la estavel tanba iha tinan 2006 mosu krizi boot ida, no rezolve hotu iha tinan 2010, tan nee iha tinan 2011 ba oin, politika rai laran lao diak tebes, no iha tinan 2017 politika rai laran lao la estavel, tanba Prezidente Republika anterior fo oportunidade liu ba governu minoria atu ukun, maibe K-DRTL la fo dalan, tan nee iha momentu neeba TL hakat tan ba eleisaun antisipada, hafoin eleisaun PR la fo nafatin, tan nee CNRT hili dalan hodi sai husi maior parlamentar no kontinua ho plataforma, agora plataforma nee besik hotu ona ho violasaun K-RDTL, se mak hasoru impaktu nee, nia impaktu nee mak povu.
Iha fatin hanesan, Deputadu David Dias Ximenes hateten, situasaun politika iha rai laran lao diak hela no laiha problema.
“Hau lao tun sae haree situasaun politika no situasaun rai laran lao diak, maski iha joven balun mak sei kakutak krimi oituan hodi sona malu iha fatin balun, maibe nee Polisia Nasional Timor Leste (PNTL) nia servisu kuaze lao hela,” dehan deputadu nee.
Nia katak, maski lider sira nee diferente hanoin ba malu, maibe la signifika katak, politika rai laran la estavel, tanba nee atu dehan deit katak, buat hotu lao diak hela.
(mad)
