DILI, STLNEWS.co – Serimonia tomada de pose ba IX Governu neebe lidera husi Primeiru Ministru (PM) Xanana Gusmão, eis Prezidente Repúblika Francisco Guterres Lu Olo ho Sekretariu Jeral Partidu FRETILIN Mari Alkatiri la partisipa, maski nunee Bankada FRETILIN partisipa.
Tuir observasaun STL haree katak, Sábado nee (01/07/2023) iha Palasiu Prezidente Republika Aitarak-Laran, situasaun entuziasmu, hetan partisipasaun masimu husi konvidadus hotu inklui konvidadus internasional, maski nunee Mari Alkatiri ho Francisco Guterres Lu Olo la partisipa, maibe deputadu husi bankada FRETILIN partisipa hotu.
Iha okaziaun nee, partisipa husi PM Sesante Taur Matan Ruak, Eis membru VIII Governu balu, maibe balu la partisipa, hanesan Visi PM Armanda Berta.
Pose nee partisipa mos husi Prezidente Parlamentu Nasional, Maria Fernanda Lay, Prezidente Tribunal Rekursu, Deolindo dos Santos, Prokurador Jeral Republika no Sekretariu Jeral Partidu PD, Antonio da Conceição Kalohan, inklui sira seluk tan, i partisipa masimu husi família membru governu sira, povu Aileba no seluk-seluk tan.
Enkuantu, konvidadus internasional hanesan Ministru Koordenadór asuntu Maritima no Investimentu Indonézia, Luhut Binsar Pandjaitan ho Visi Ministru Negósiu Estranjeiru Myanmar Nung Zin Mar Aung, senator DPRI Shi Gusty Arya Wedakarna, Eis Ministra Peskas no Maritima Susi Pudjiastuti, Eis Ministru no Xefe Kaza Sivil, Dino Puti Jallal, nomós Governadór NTT, Victor Bungtilu Laiskodat, embaixador sira neebe iha Timor-Leste, nomós konvidadus espesiál sira seluk tan.
Serimonia nee halao tuku 4:00 OTL, antes nee iha tuku 2:00 dalan publiku ba iha Palasiu PR hahu taka husi tranzitu sira, hodi fo dalan ba membru IX Governu ho konvidadus sira neebe partisipa iha pose ba IX Governu.
Too iha Palasiu PR, PM sesante Taur Matan Ruak, iha tuku 3 liu, nunee tuir mai membru governu sira seluk too tuir, iha tuku 3:40 PM Xanana Gusmão too.
Hafoin membru IX Governu too kompletu, no konvidadus hotu tuku 4:00, Prezidente Repúblika José Ramos Horta hakat mai tenda VIP, membru IX Governu ho PM Xanana Gusmão tuur ba.
Iha tenda pose VIP iha 3, ida ba membru IX Governu, iha klaran VIP husi liman karuk, ba konvidadus Internasional, tenda VIP husi liman loos ba konvidadus nasional, eis membru governu, eis deputadu sira.
Serimonia tomada de pose hahu iha tuku 4:00 no remata iha tuku 6 liu.
Postura IX Governu iha 47, neebe kompostu husi feto 7, mane 40, husi 47 nee CNRT nain 34, PD nain 10, no Independent nain 3.
Iha oportunidade nee, iha programa balu husi Prezidente Repúblika hatudu video badak, labarik mane oan ida video viral iha media sosial, konaba lasimu rezultadu eleisaun Xanana atu lakon, laos nee deit, maibe iha mos inan ka avo feto ida neebe optimista iha eleisaun katak Xanana manan.
Hafoin loke video badak nee, bolu kedas inan ka avo nee no labarik mane nee sae kedas ba iha tenda pose nian, iha biban nee mos PM Xanana Gusmão husik nia fatin ka kadeira hodi fo ba labarik mane nee tur iha minutu balun.
Situasaun lao hakmatek, tanba partisipa masimu husi seguransa sira.
(gui)
