DILI, STLNEWS.co – Prezidente Parlamentu Nasional (PPN), Aniceto Guterres halao enkontru ho Programa Nasoes Unidas para Dezenvolvimentu (PNUD), hodi koalia ba orsamentu sensivel jeneru, labele implementa ba atividade seluk.
Hatete PPN Aniceto Guterres ba jornalista sira, bainhira remata enkontru ho PNUD iha uma komunikasaun Parlamentu Nasional.
“Ami koalia konaba orsamentu sensivel jeneru, ita nia rai nee ita iha politika ba promove jeneru, maibe iha implementasaun nee orsamentu iha, koloka tiha dala ruma osan ba atividade promosaun jeneru nee uza fali ba sosa kareta no buat seluk. Ida nee laiha konsistensia entre politika ho orsamentu, tanba implementasaun ba buat seluk,” katak Aniceto.
Nia hatete, kestaun neebe PN nia kompetensia eskluziva atu aprova orsamentu jeral estadu, tanba nee PN rasik emves atu aprova tenki haree mos ba orsamentu neebe ba iha sensivel jeneru.
Tanba nee, tenki espesifika mos iha area sira neebe hetan alokasaun orsamentu ba promosaun feto labarik feto, nunee iha implementasaun mos PN iha knaar ba fiskalizasaun, tenki haree mos ba osan espesifiku sira nee.
Tuir nia, governu linhas ministerial no entidade sira iha implementasaun orsamentu nee kumpri duni orsamentu neebe alokadu i uza duni ba sira nia atividade, labele uza fali ba atividade seluk.
Neebe koalia ohin nee anivel konsulta teknika entre ajensia parseiru dezenvolvimentu hanesan PNUD ho PN.
Entretantu, observasaun STL haree enkontru entre PPN Aniceto Guterres ho PNUD iha tuku 10 no remata iha iha tuku 11 liu.
(gui)
