LIKISA, STLNEWS.co – Prezidensia Republika (PR) liu husi Xefi Kaza Civil distribui foos nutritivu espsial ba labarik sira iha Munisipiu Likisa.
Prezidensia Republika liu husi Xefi Kaza Civil, Jesuína Maria Ferreira Gomes, Kuarta nee, hahu distribui foos nutritivu espesial ba labarik sira. Programa nee hetan apoiu husi grupu emprezarial Malazia ho total foos saku 2500.
Iha biban nee, Xefi Kaza Civil, Jesuína Maria Ferreira Gomes liu husi nia diskursu antes distribu ba labarik sira iha Postu Administrativu Bazartete Munisipiu Likisa, Kuarta (16/08/2023) hatete, ohin nia lori foos saka 50 apoiu ba labarik sira hodi hasae nutritivu.
“Hau lori apoiu oituan ho saku 50. Foos nee ba labarik sira, atu tulun labarik sira nia pezu no dezenvolve labarik sira nia fíziku no kapasidade kakutak nian,’’ hateten Xefi Kaza Civil.
Xefi Kasa Civil informa, distribuisaun foos iha eskola nee hanesan dahuluk no sei kontinua mos ba eskola sira neebe halo ona identifikasaun iha teritoru nasional.
Nunee mos Prezidente Republika Jose Ramos-Horta iha nia mandatu tau prioriedade aas tebes ba kombate malnutrisaun neebe tuir dadus iha 47% labarik iha Timor-Leste mak afetadu. Aleinde nee, iha mos programa atu hadiak liu tan atendimentu ba inan isin rua no susuben inan nian ba labarik sira.
Tuir planu, Prezidénsia Republika iha semana nee sei kontinua distribui ba Orfanato iha Maubara, Loes no Maliana.
Nunee mos Fundadora Pre-eskolár Bermeta, Madalena Bidau Soares “Kasian’’ agradese apoiu neebe nia estudante hamutuk ema nain-97 nee simu.
“Hau loke eskola iha nee, atu lori istoria funu sai ba neebe deit tamba nee ha’u haksolok ba apoiu, hodi hatudu katak Prezidente Republika hatene direta katak kiik oan sira iha nee laos tuur deit, maibe buka matenek,” dehan veterana Madalena.
Aleinde apoiu foos, Prezidensia Republika hahu iha Maiu 2022, ajuda mos eskola sira ho dalan oi-oin no fo apoiu sosial ba sidadaun vulneravel sira hamutuk 1000 resin.
(eme)
