PR Fahe Ekipamentu Ba UNITAL

DILI, STLNEWS.co – Prezidente Republika (PR) fase doasaun ekipamentus bola, nomos livru ba iha Universidade Oriental Timor Lorosae (UNITAL).

Xefe Kaza Sivil Prezidensia Republika Bendito Freitas ba jornalista sira hafoin remata fahe ekipamentu iha UNITAL, Kinta (27/04/2023) hatete, Prezidensia Repubpika oferese doasaun ekipamentus tebe bola no livru balun, neebe oferese husi Prezidente Republika José Ramos Horta atu bele tulun volume ba leitura, iha UNITAL.

Xefe Kasa Sivil hatutan, UNITAL hanesan viveirus, ba líder sosiedade foun nian, viveirus ida forma ema atu konstrui sosiedade ida justu, dinamiku no fraternu, misaun universidade nee fundamental tebes-tebes, kada nasaun ida atu forma ema ho responsavel.

“Momentu ida nee reprezenta Prezidente Republika mai fahe doasaun ekipamentu sira hanesan suteras atu tebe bola no mós livru balu, neebe oferese husi Prezidente Repúblika, atu bele tulun volume ba leitura, iha Universidade nian, atu bele aprofunda liután ba joven universitariu sira no mos ba korpus dosentes sira, sira nia asesu ba fonte literaria ka livru balu nee bele ajuda,” dehan nia.

Xefe Kasa Sivil nee hatutan, Prezidente Republika nia atensaun boot ida mak formasaun rekursu umanu importante teb-tebes, tanba iha polítika tinan nee, karik buat hotu lao diak, karik adezaun ba ASEAN presiza teb-tebes, kuadru profisionais neebe kompotente, atu bele servisu iha departementu oi-oin, atu bele responsabiliza ba servisu Estadu, no halo kooperasaun diak ho nasaun vizinu sira.

Nia dehan, iha universidade estudante sira futuru líder, feto, mane neebe iha ne’e, futuru aban bainrua nian, tanba nee estuda didiak.

Iha fatin hanesan, Reitór UNTL Florindo Pereira hatete, UNITAL sempre prontu bainhira Prezidensia Republika nia atividade ruma, presiza sira prontu suporta no apoiu nafatin.

“Ami sempre suporta nafatin, neebe ita nia relasaun ho Prezidente Ramos Horta dezde ita harii universidade nee, tanba ida nee mak foin daudaun atividade saída deit mak Prezidente Republika halo, UNITAL sempre prontu,” dehan nia.

Nia haktuir tan, sasan ruma neebe parseiru fo ba Timor oan, liu husi Prezidensia Republika, Prezidente Republika mos la haluha UNITAL, ida nee mak UNITAL ohin iha atividade atu entrega sasán ruma neebe Embaixada Korea fo ba Timor, liu husi Gabinete Prezidensia Republika.

(eme)