DILI, STLNEWS.co – Prezidente Republika (PR) Jose Ramos Horta halo palestra konaba okajiaun Diplomacy Training, koalia mos konaba deklarasaun universal direitus humanus, tratadu internasional, iha Palasiu Prezidente.
Bainhira remata halo palestra konaba okajiaun Diplomacy Training, Prezidente Republika Jose Ramos Horta ba jornalista iha Palasiu Prezidente Bairo Pite, Sesta (25/08/2023) hatete, palestra nee laos premeiru vez, maibe halo dala barak ona iha mundu.
“Palestra nee hau halo dala barak ona, atus ida ka atus rua, iha australia ka iha mundu, no programa nee bolu Diplomacy Training Programa, maibe laos deit dipolomasia, liu-liu programa nee konaba diretus humanus, koalia konaba deklarasaun universal direitus humanus, tratadu internasional hotu konaba direitus humanus, koalia konaba sistema nasoens unidas, no koalia mos konaba solidaridade internasional benefisia barak los iha kotuk,” Hatete PR Horta.
Prezidente hatete, iha palestra nee oinsa koalia konaba direitus internasional, no direitus humanus, maibe labele haluha mos konaba asaun politika no solidaridade, no labele haluha mos media, tanba bainhira defende direitus humanus tenki hatene mos loby governu, lobi politiku sira.
Xefi Estadu hatete, programa nee besik tinan 30 ona, nia mak hahu halo dezain iha Australia, no programa nee halo iha Australia, Timor, Tailandia nomos iha fatin seluk tan, total ema rihun haat ka liu mak partisipa tiha ona iha kursu nee.
“Ema barak gosta no ema barak aprende buat ruma, maibe hau mos hare tinan 30 ona dezde kampanhia direitus humanus iha mundu nee avansa, maibe situasaun direitu humanus iha mundu mos balun kada vez pior liu tan, entaun esplika ba sira. Katak laos o hatene simu diploma no aprende ba buat neebe ami hanorin nee rezolve ona problema lae, maibe ho situasaun politika, situasaun mundu internasional ke halo situasaun difisil liu atu para demokrasia bele moris haburas kada sosiedade,” dehan PR Horta.
Xefi Estadu hatete, programa nee laos atu halo advokasia ba kauza ruma, maibe programa nee training deit, la toma partidu, la komenta konaba situasaun espesifiku, maibe nee hanesan formasaun tekniku, formasaun akademiku ba ema.
Nunee mos partisipante Francelino do Santos husi UNTL hatete, nia senti kontenti hodi tuir palestra konaba Diplomacy Training, neebe mak hatoo husi Prezidente Republika Jose Ramos Horta.
“Hanesan partisipante, hau senti kontenti hodi partisipa Diplomacy Training, tanba prezidente hanesan ema diplomata ida neebe fahe mos nia esperensia ba joven sira espesialmente hanesan ami, neebe tuir Diplomacy Training, nee ami senti kontenti tanba bele rona buat barak husi sira nia esperensia,” katak nia.
Nia hatutan, iha biban nee sira mos rona palestra konaba esperensia diplomasia, Timor Leste nia bainhira hetan ukun rasik aan, esperensia nee importante ba jerasaun foinsae sira inklui mos partisipante seluk.
Tuir observasaun neebe mak STL hetan, iha palestra konaba Okajiaun Diplomacy Training hatoo direita husi Prezidente Republika Jose Ramos Horta, no iha biban nee partisipante sira mos iha diskusaun ho PR liu husi husu no hatan.
Partisipante neebe mak partisipa iha okajiaun nee mai husi estudante husi nasaun oin-oin hanesan Papua, Indonezia, Mianmar, Timor Leste inklui mos partisipante seluk tan.
(eme)
