DILI, STLNEWS.co – Prezidente Republika (PR) Jose Ramos Horta hatete, nia ezije hodi halo investigasaun ba pesoal funsionariu Palasiu Prezidensial, neebe mak utiliza kareta estadu hodi tula atributu ropa CNRT.
Prezidente Republika Jose Ramos Horta hatoo kestaun nee ba jornalista sira, bainhira remata partisipa serimonia graduasaun estudante Universidade Nasional Timor Lorosae (UNTL) iha Centro Convencao Dili (CCD) Kaikoli, Tersa nee (11/04/2023).
Nia hatete, relasiona ho video neebe viral katak, kareta Palasiu Prezidensial tula atributu CNRT nia haree ona.
“Hau haree ona iha video oan ida kamizola la hatene iha ida rua ka tolu iha kareta laran, pois hau mos haree video seluk ida KHUNTO ho kareta estadu. Sira bee hakilar konaba kamizola CNRT iha kareta laran prezidensial, hau ezije ona investigasaun, maibe hau rona sira ezije kamiza iha kareta prezidensial, maibe sira la ezije konaba kareta estadu nia iha kampanha KHUNTO, nee normal, hau la ezije ba ida nee,” katak PR Horta.
Prezidente hatete, nia fo ona orientasaun, se funsionariu pesoal balun mak kontra regra sei simu sansaun.
“Orientasaun hau fo tiha ona, se mak viola hau nia orientasaun ka hatete labele uza propriedade estadu nia ba privadu ka kampanha, hau fo orientasaun kleur ona, agora hau hakarak hatene se mak kaer kareta ida nee,” dehan Xefi Estadu.
(eme)
