DILI, STLNEWS.co – Prezidente Republika (PR) Jose Ramos Horta hasoru malu dahuluk ho eis Primeiru Ministru (PM) Inglaterra Tony Blair iha loron 17 fulan Setembru 2023.
Liu husi komunikadu imprensa neebe mak STL asesu husi Media Palasiu Prezidente, Segunda nee (18/09/2023) hatete, enkontru bilateral dahuluk entre Prezidente Republika Jose Ramos Horta ho eis Primeiru Ministru Tony Blair halao iha lokraik oras 14:00 (oras Nova Yorke) iha Hotel Grand Hyatt, Estadus Unidus Amerika (EUA).
Enkontru nee halao iha okaziaun partisipasaun Prezidente Republika iha Jestaun 78 Assembleia Jeral Nasaun Unidas (UNGA), iha kuadru vizita ofisial prevista entre 17 too 24 fulan Setembru 2023.
Durante enkontru nee, Prezidente Republika husu ba Tony Blair Institute atu estabelese kooperasaun parseria iha area re-estruturasaun ba Prezidensia Republika, liu husi destakamentu husi peritus rua ka tolu ka espesialista sira husi institutu ida nee iha Inglaterra, Reinu Unidu.
Institutu nee realiza kooperasaun hanesan ho Gabinete Xefi Estadu ka governu sira, ho projetu ativu iha nasaun 30 iha mundu tomak.
Liu husi apoiu iha re-estruturasaun Gabinete Presidensia, peritus sira bele fo apoiu iha formasaun rekursu umanu, espesifikamente iha preparasaun ba estrutura sira neebe presiza ba prosesu adezaun ba Association of Southeast Asian Nations (ASEAN) no World Trade Organization (WTO).
Nunee mos kooperasaun bele inklui prosedimentu internu no pratika internasional neebe diak, inklui uza teknolojia informasaun dijital foun sira ba promosaun asaun transformadora no fasilita asesu ba informasaun neebe iha baze konaba asuntu sira prinsipal no dezafiu global sira, liu husi sede institutu refere iha Londres, Inglaterra no rede global nia laran, liu-liu lian iha delegasaun rejional iha Singapura.
(eme)
