DILI, STLNEWS.co – Prezidente Republika (PR) Jose Ramos Horta kondekora Doutor Vincent Braganza ho Medalha Colar, tanba durante nee doutor mos kontribui hodi fo atendimentu ba sidasaun sira iha Timor Leste.
Liu husi diskursu iha Palasiu Prezidente Bairo Pite, Kinta lokraik (28/09/2023), prezidente hatete, fo kondekorasaun nee sentidu hatoo agradese ba Doutor Braganza nia kontribuisaun ba Timor Leste, no kondekora doutor iha tempu baibain laos iha loron nasional ruma, tanba doutor iha ajenda barak.
“Tinan 10 ona nia iha Timor Leste iha mos Baukau, Lospalos no Suai, momentu neeba hau eis prezidente hau kolabora fasilita hau nia kareta ida, fasilita hau nia alin mak akompanha doutor ba Baukau nomos ba neebe deit, depois kalan servisu hotu, doutor ho hau nia alin hemu tua tanba kolen,” katak PR Horta.
PR horta hatete, ohin fo kondekorasaun ba doutor tanba ninia kontribuisaun boot iha Timor Leste liu husi atendimentu mediku hodi salva ema lubuk ida, halo sirogia lubuk ida.
“Doutor lubuk ida mak akompanha, laos doutor Timor oan deit, maibe doutor Kubano iha hospital mos akompanha hodi sai testamunha sirogia, nia hatete dala barak ona buat barak, iha karik ekipamentu iha Hospital Nasional Guido Valadares bele halo sirogia, la presiza haruka ba singapura, bele poupa osan lubuk ida, nia ema ida simples husi relijiaun famozu konhesidu iha Alemanha, Inglatera, nia uluk mos iha Brazil nia koalia portugues oituan,” katak nia.
Nia hatutan, husi servisu doutor nia mak prezidente rekonhese fo homenajen nudar agradesimentu ba nia kontribuisaun, no nia sei kontinua nafatin apoiu Timor Leste.
Iha fatin hanesan, Doutor Vincent Braganza hatutan, senti kontenti tanba ohin Prezidente Republika fo rekonhesimentu ba nia servisu neebe mak durante nee nia halo iha Timor Leste.
Nia hatete, atedimentu ba sidadaun sira nee nia mak hakarak halo ida nee, laos nee deit, maibe nia fo kursu ba tinan 35 iha Alemana hamutuk ho Dr. Belun sira iha Alemana,” katak nia.
(eme)
