PR Horta Kongratula Servisu PERMATIL Iha TL

DILI, STLNEWS.co – Prezidente Republika (PR) Jose Ramos Horta kongratula no hatoo parabens ba servisu PERMATIL neebe durante nee rekupera ona bee matan 300 resin iha Timor Leste (TL).

Prezidente Republika Jose Ramos Horta hatoo lia hirak nee ba jornalista sira, bainhira partisipa Primeiru Kongresu Nasional PERMATIL iha Salaun CNE Kaikoli, Kuarta (29/11/2023).

“Hau kontenti tebes fo parabens no apoiu makaas ba Ego Lemos, ho nia organizasaun PERMATIL tinan hira nia laran halo servisu neebe diak, klean, kualidade para rekupera bee matan iha TL, rekupera ona bee matan 300 resin, maski ho loron manas boot fulan hira nee la udan bee matan sira nee kontinua iha bee,” dehan PR Horta.

Prezidente Republika hatete, durante nee Ego Lemos hatete ona ba prezidente katak, karik bele hetan apoiu husi prezidente ka governu apoiu makaas tinan 5 nia laran bele rekupera bee matan iha Timor Leste tomak.

“Entau hau hatete ba nia, o haree ba projetu ideal konseitu orsamentu planu didiak hau garante mobiliza finansiamentu nasional, lalika preokupa ho governu, tanba governu iha prioridade barak, no governu mos halo planu daudaun konaba agua no saneamentu, balun komunidade internasional Australia no Estadu Unidos sira halo, maibe ida rekupera bee matan nee uniku hau hatene nee PERMATIL Ego Lemos,” katak Xefe Estadu.

PR hatete, sira neebe estuda durante ferias kuandu eskola remata inves tuur bilan la halo buat ida, mobiliza sira hamoos lisu iha Timor Leste laran tomak no kuda ai ajuda PERMATIL, hadia bee matan sira fo pagamentu ba sira.

Nia hatutan, presiza apoiu osan ruma ba joven sira, hodi hadia ambiente labele, servisu voluntariu deit, kombinasi fo osan balun no fo hahan.

Xefe Estadu haktuir tan, programa nee simple, nee mak PR Horta nia preokupasaun koalia ona ho doador balun, no PR iha konfiansa neebe bele halo, diak liu entrega ba NGO sira hanesan PERMATIL sira mak kaer programa sira nee.

(eme)

LEAVE A REPLY

Please enter your comment!
Please enter your name here