PR Horta Propoin Organizasaun 2 Hetan Premiu Fraternidade Umanu

DILI, STLNEWS.co – Prezidente Republika (PR) Jose Ramos Horta hatete, nia mak propoin no nomeia Nahdlatul Ulama no Muhammadiyah husi organizasaun movimentu boot 2 Indonezia nian, neebe hetan premiu Zayed ba Fraternidade Umanu 2024 iha Abu Dhabi.

Prezidente Republika Jose Ramos Horta hatoo lia hirak nee ba jornalista sira, bainhira fila hikas mai iha Timor Leste, iha Aeroportu Nicolao Lobato, Kuarta (07/02/2024).

Nia hatete, nia partisipa serimónia Franternidade Umanu neebe halao iha Abrahamic Family House no halibur lider relijiozu no polítiku sira husi mundu tomak.

“Kintu aniversariu premio Fraternidade Umanu, tanba hau mak nomeia no propoin Premiu Nahdlatul Ulama no Muhammadiyah organizasaun movimentu boot rua Indonezia nia neebe boot liu iha mundu hanesan organizasaun musulmanu, Hau mak propoin sira nia naran ba premiu boot nee naran premiu Fraternidade Umanu lema nee mai husi Amu Papa ho o Imam Boot Al-Azhar, Ahmed El-Tayeb, lider boot religiosu iha mundu, ” hatete PR Horta.

Prezidente Republika hatete, organizasaun rua nee mak manan premiu nee, iha serimonia Visi Prezidente Indonezia mos marka nia prezensa, no PR tranzit husi Inglatera dia 3 Fevereiru no dia 4 no 5 PR para iha Abi Dhabi hodi asisti deit laiha atividade seluk. “Hasoru visi Prezidente Indonezia premiadu nain rua organizasaun rua nee,” katak nia.

Iha biban nee, Nahdlatul Ulama no Muhammadiyah mos hatoo agradese ba Prezidente Republika Republika Jose Ramos Horta neebe halo proposta hodi ba juri Fraternidade Umanu para sira hetan premiu nee hanesan rekonhesimentu boot.

Nia hatutan, sira kontenti tanba premeira vez organizaun rua nee hetan rekonhesimentu boot primeiru organizasaun ASEAN nia.

Prezidente J. Ramos-Horta partisipa iha serimonia fahe premiu Zayed ba Fraternidade Umanu 2024 iha Abu Dhabi. Serimonia nee halao iha Abrahamic Family House no halibur lider relijiozu no polítiku sira husi mundu tomak.

Ramos Horta hetan konvite privadu atu tuir eventu neebe husi Papa Francisco no Imam Boot Al-Azhar, Ahmed El-Tayeb, tanba nia propoin ona organizasaun Indonezia rua, Nahdlatul Ulama no Muhammadiyah neebe hetan premiu tinan ida nee.

Ramos-Horta hahii organizasaun sira-nia servisu atu promove toleransia, edukasaun no moris diak sosial iha Indonezia.

Premiu Zayed selebra ema sira neebe iha kompriensaun no asaun ba fraternidade umanu. Tinan ida nee marka aniversariu ba dala haat husi adopsaun ONU nian ba Loron Internasional Fraternidade Umanu.

(eme)

LEAVE A REPLY

Please enter your comment!
Please enter your name here