DILI, STLNEWS.co – Prezidente Republika (PR) Jose Ramos Horta sei fo pose ba membru governu foun neebe mak Primeiru Ministru (PM) indizita ou hili ona hodi entrega ba Xefe Estadu.
Prezidente Republika Jose Ramos Horta hatoo kestaun nee ba jornalista sira iha Aeroportu Nicolao Lobato, bainhira remata vizita estadu ba Alemanha, Kuarta nee (28/06/2023).
PR Horta hatete, naran neebe Primeiru Ministru lori ba Xefe Estadu sei fo pose, tanba povu mak hili hodi manan maioria.
“Hau fo pose ba membru governu neebe Primeiru Ministru lori mai, tanba Primeiru Ministru povu hili mak hetan maioria, Primeiru Ministru mesak labele governa, tanba nee mak iha governu ida nia iha kompetensia konstitusional legal no uniku iha sistema politiku konstitusional PR la hili membru governu, Primeiru Ministru mak hili nia membru governu,” dehan PR Horta.
Prezidente Republika hatete, se membru governu balun kazu iha Tribunal, Primeiru Ministru rasik hatene, tanba nee la presiza PR mak haree fali ida nee.
“Mezmu kazu iha tribunal, maibe ema nee seidauk julgadu, seidauk kondenadu, entau prinsipiu direitu mak nee, inosente ate provadu,” katak nia.
Aleinden nee, konaba kazu neebe foin lalais jornalista nomos editor Hatutan.com foin lalais Ministeriu Publiku bolu ba halo investigasaun, hahalok ida nee afavor ba liberdade imprensa ka lae? Hatan ba kestaun nee PR horta hatete, nia la hatene PJR servisu barak ka lae? Se servisu la barak bele bolu jornalista ida satea, tanba serbisu la barak.
“Karik jornalista hakerek buat ruma sala karik, se hakerek sala tanba nia nakar hakarak hakerek duni nee laos krimi boot ida, ita lakon fali tempu ba buat sira nee, se tanba jornalista hakerek buat ruma sala laiha liu konsekuénsia ba Timor ou ba mundu, se governante halo buat ruma sala bele iha konsekuénsia, tanba programa governu nia no orsamentu jeral estadu nia, agora lakon fali tempu ba jornalista sira, se lori Hatutan ba tribunal diak liu tan, tanba publisidade boot los tanba ema nunka rona Hatutan,” katak Horta.
Konaba oras nee daudaun iha hospital sira laiha aimorok, prezidente mos koalia ho Primeiru Ministru mai favor haree instituisaun autonomo iha Timor laran nee barak demais no manan osan boot deit US$ 6 mil no US$ 7 mil, manan liu fali ministru ida, manan liu Prezidente, PTR, PPN, maibe servisu lalos, tanba nee nia koalia ona ho Xanana Gusmao hodi haree ba ida nee.
(eme)
