PR Horta Viajen Ba Dubai, Partisipa Simeira Asaun Klimatika Mundial

DILI, STLNEWS.co – Prezidente Republika (PR) Jose Ramos Horta viajen ba iha Dubai, Emiradu Arabes Unidus, hodi partisipa simeira asaun klimatika mundial.

Iha loron 30 fulan Novembru 2023, Prezidente Republika Demokratika Timor Leste no Premiu Nobel ba Pas, Jose Ramos Horta halo hela viajen ba Dubai, Emiradus Arabes Unidus. Husi loron 30 fulan Novembru too loron 3 Dezembru tinan 2023.

Vizita nee mai ho konvite husi S.H. Sheik Mohamed bin Zayed Al Nahyan, Prezidente Emiradus Arabes Unidus no Governador Abu Dhabi, hodi partisipa iha Simeira Asaun Klimatika Mundial.

Sorumutu Asaun Klimatika Mundial nee sai hanesan segmentu nivel aas husi konferensia parte sira ba da-28 (COP-28) ba Konvensaun Enkuadramentu Nasoins Unidas nian kona ba Mudansa Klimatika (UNFCCC).

iha loron 28 fulan Novembru too loron 12 Dezembru tinan 2023, iha Prezidensia EAE nian, COP-28 sublina kompromisu global atu responde ba mudansa klimatika.

Konvite ba Simeira Asaun Klimatika Mundial sublina nesesidade krítiku ba lideransa mundial sira atu tradus desizaun sira neebe relasiona ho klima ba asaun tangivel no planu kredivel sira ho objetivu prinsipal atu hasae esforsu global sira hodi kombate emerjensia klimatika no promove asaun koordenada sira hodi responde ba mudansa klimatika.

Iha loron 2 fulan Dezembru tinan 2023, Prezidente Ramos Horta sei entrega deklarasaun nasional Timor Leste nian iha Simeira Asaun Klimatika Mundial neebe koalia liu kona-ba esperiensia nasaun nian kona-ba impaktu oioin husi mudansa klimatika, hanesan inundasaun, rai-rahun, rai-slide no nivel tasi, neebe hamosu redusaun iha produsaun agrikultura, aumentu iha inseguransa ai-han, falta bee, destruisaun infraestrutura, lakon moris umanu, deslokasaun no mos limitasaun iha kapasidade finanseira no teknolojia ba rekuperasaun.
Prezidente Ramos-Horta sei koalia liu kona-ba prioridade sira Timor-Leste nian kona-ba adaptasaun no mitigasaun. Nasaun nee halo ona planu adaptasaun nasional (PNA), Programa Asaun Adaptasaun Nasional (PANA), no halo revizaun ba ninia Kontribuisaun Nasional Determinada (NDC) tuir rekizitu husi UNFCCC. Iha area mitigasaun nian,Timor-Leste iha kompromisu atu halo dalan dezenvolvimentu ho karbonu kiik, foka liu ba enerjia renovavel no reforestasaun.

“Ho prioridade adaptasaun iha area agrikultura, seguransa ai-han, bee, infraestrutura no saude, ami husu ba parte sira husi nasaun dezenvolvidu sira atu finansia implementasaun ida-neebe kompletu ba prioridade prinsipal sira adaptasaun nian iha APN nia okos atu hasar ita-nia reziliensia. Ami mos hetan enkorajamentu no agradese ba kompromisu UAE nian hodi tulun Timor-Leste hodi halo tranzisaun ba enerjia solar,” deklara Prezidente Ramos-Horta.

Prezidente ezije ba Organizasaun Mundial Saude (OMS), atu rekonese efeitu mudansa klimatika ba biodiversidade nuudar dezafiu saude global ida no apela ba parte sira husi nasaun dezenvolvidu sira atu lidera redusaun emisaun gas estufa, hamutuk ho nasaun boot sira seluk neebe emite, atu alkansa emisaun net-zeru too 2050.

Durante vizita nee, Prezidente Ramos-Horta sei halao sorumutuk bilateral ho nia Eminensia, Major Imao Al Azhar, Prof. Ahmad Al Tayeh, no Juis Abdelsalam husi Konsellu Katuas Muslim. Prezidente sei remata ninia atividade hotu iha Dubai, Emiradus Arabes Unidus, iha fulan Dezembru.

(eme)

LEAVE A REPLY

Please enter your comment!
Please enter your name here