DILI, STLNEWS.co – Prezidente Republika (PR) Jose Ramos husu Governu Malazia atu hasae kooperasaun iha area edukasaun, nunee fo bolsu estudu ba Timor oan sira.
Opiniaun Prezidente Republika Jose Ramos Horta nian transmite husi Visi Ministru Negosiu Estranjeiru no Kooperasaun (MNEK), Juliao da Silva ba jornalista sira bainhira remata halo enkontru kredensial ho Embaixador Malazia ba Timor Leste iha Palasiu Prezidente Bairu Pite, Tersa nee (21/03/2023).
“Iha enkontru kredensial nee, Prezidente Republika husu nafatin lasu amizade bilateral, Prezidente Republika foka makaas liu mak husu ba Governu Malazia hasae liu tan kooperasaun iha area edukasaun, hodi fo oportunidade bolsu estudu ba Timor oan sira, barak liu diak liu tan, aumezmu tempu husu aumenta kapasitasaun ba iha media, oinsa sira bele apoiu formasaun ba media,” katak nia.
Iha enkontru kortezia nee, Prezidente Republika husu Malazia kontinua ajuda Timor Leste, liu-liu entre setor privadu Timor Leste ho setor privadu Malazia, para bele hasoru malu, oinsa bele hadia no dezenvolve ekonomia Timor Leste nian.
“Prezidente Republika mos agradese tebes ba apoiu Governu Malazia nia, durante ita enfrenta pandemia Covid-19, nasaun uniku neebe bele fo ita oportunidade mak Malazia, tanba apoiu sidadaun neebe husi liur mai TL ou ita transporta pasiente ba Malazia, no tempu pandemia sira nafatin simu ita, Prezidente Republika agradese ba ida nee,” dehan ministru.
Prezidente Republika mos husu Malazia atu apoiu nafatin Timor Leste hodi adere ba ASEAN.
Iha biban nee mos, Visi Ministru MNEK, Juliao da Silva hatete, depois tinan 1 resin Embaixador Malazia sesante nia mandatu hotu ona no ohin Prezidente Republika simu ona karta kredensial husi Embaixador Malazia iha Timor Leste, agradese tanba iha ona embaixador.
Visi MNEK hatete, kooperasaun bilateral entre nasaun rua nee importante tebes, tanba Malazia hanesan nasaun ida neebe mak importante iha lasu amizade, tanba TL nia indepedensia, Malazia mos apoiu iha misaun ONU ajuda tebes TL iha momentu neeba.
Nunee mos Embaixador Malazia Ba Timor Leste, Amarjit Sinhg hatete, bainhira aprezenta karta kredensial ba Prezidente Republika Jose Ramos Horta, katak nia mak agora nudar Embaixador Malazia hodi halao misaun iha Timor Leste.
Iha enkontru kredensial nee, Embaixador Malazia hatete, konaba opiniaun husi Prezidente Republika nian, embaixador mos simu ho kontenti no sei tau nota ba preokupasaun hotu, depois ida nee, semana ida ka rua hahu nia misaun bele diskuti ho ninia Governu Sentrais Malazia, hodi haree ba kestaun prezidente nian.
Mandatu Embaixador Malazia Ba Timor Leste tinan 3, maibe maibe haree posivel governu bele estende ou lae.
(eme)
