PR Husu Hametin Rekonsiliasaun Dame, Igreja Kontribui TL Nia Istoria

BAUKAU, STLNEWS.co – Prezidente Republika Jose Ramos Horta husu igreja hametin rekonsiliasau dame, tanba igreja mos kontribui makaas ba istoria Timor nia liu husi luta ba libertasau nasaun.

Prezidente Republika hatoo lia hirak nee liu husi nia diskursu bainhira partisipa selebra misa ordenasaun ba Bispu Dom Leandro Maria Alves iha Uma Laku Katedral Baukau, Sesta (21/07/2023).

Prezidente hatete, ohin loron festa boot, festa relijioza, festa popular iha Timor-Leste tomak, PR hakruk ba hotu hotu, no hakruk ba memoria bispu no padre madre sira hotu, ba sira neebe la hamutuk ho loron ohin, tan sira hakaat ona ba mundu seluk, hanoin Bispu Basilio do Nasimento, Dom Ricardo, Dom Martinho da Costa Lopes no sira seluk tan.

Prezidente hatete, ohin sarani Timor-Leste hotu iha rai laran no rai liur, nomos sarani husi relijiaun protestante, musulmanu hamutuk simu amu Bispu Dom Leandro Maria Alvés, nudar Bispu Dioseze Baukau, todan nee tula iha amu bispu nia kabas, todan nee sei sai kmaan, tan todan nee iha kreda tomak nia kabas, todan mak saída los?, todan mak kontinua misaun, evanjelizasaun kristaun.

“Kontinua hametin kultura no identidade nasional no kontinua hametin rekonsiliasaun no dame, fraternidade umana, igualidade jeneru, feto no mane direitu hanesan, hadomi oan sira defisiensia no nesesidade, kontinua kontribuisaun, formasaun moral, etika, formasaun manista, formasaun iha siensia,” katak PR.

Xefi Estadu hatutan, igreja katolika mak kontribui iha tinan atu ba atus formasaun Timor nia istoria, relijiaun homojenia, identidade kultura dignidade Timor-Leste nian iha mundu.

“Prezidente Republika sei kontinua nia misaun hanesan, hakerek ho osan mean iha konstituisaun RDTL 2002, hanesan kreda nian hanesan hau temi iha leten, hametin unidade, dame, rekonsiliasaun, promove polítika konaba edukasaun, saude, polítika neebe diak, hamlaha sub-nutrisaun, hamate situasaun kiak iha rai laran, ita hotu-hotu buka tane governu, i buat hotu-hotu neebe kontribui mos ho objetivu sira iha leten, estadu eziste atu servi povu, igreja eziste atu servi povu,” katak Horta.

Iha biban nee, Prezidente Republika mos hatoo parabens ba povu Timor-Leste, parabens ba povu Baukau neebe hetan oan ida atu servi nudar Bispu Dioseze Baukau.

(eme/joa)