DILI, STLNEWS.co – Prezidente Republika (PR) Jose Ramos hatete, lider partidu politiku sira tun ba kampanha, diak liu hatoo mak planu no programa tinan 5 nian, labele buka insulta malu.
Prezidente Republika Jose Ramos Horta hatoo kestaun nee bainhira partisipa iha konferensia nasional fraternidade humana ba fator esensial no konsolidasaun pas no estabilidade ddemokrasia iha Salaun CNE, Kuarta nee (12/04/2023).
“Partidu politiku sira mensajen mak nee, halo diskursu intervensaun ba futuru tinan 5 mai no tinan 10 mai nee, tanba rai ida nee sosiedade ida nee enfrenta daudaun i sei enfrenta situasaun difisil liu tan iha tinan sira mai nee ho situasaun mundial difisil tebes, impaktu daudaun ba ita, hatene situasaun mundial ekonomia bele pior liu tan, bele akontese folin mina la buat ida, bele akontese iha ita nia dolar monu tun aat liu,” dehan nia.
Xefi Estadu hatete, nia lee buat oin-oin konaba ekonomia no PR mos koalia ho ekomista balun, no halo zoom ho grupu boot ida mundial iha Fransa hodi halo briefing no PR mos koloka perguntas hodi sira responde konaba ekonomia mundial, gas, petroleo, konaba dolar nee implikasaun mos ba TL.
“Iha ita nia rai laran ita iha posibilidade para ita kontinua mantein Timor Leste hanesan ilha de pas refuzu de pas, refuju de fraternidade, laiha razaun para halo violensia, maski ita nia estadu bele fraku, ita nia institusaun sira bele fraku, maibe Timor Leste laiha persegisaun politiku, laiha preju politiku, laiha jornalista freju, laiha akademiku preju, laiha intelektual preju, laiha tortura, laiha buat sira nee, laiha diskriminasaun ofisial preju ba grupu minoritariu, laiha diskriminasaun ho grupu oin-oin, ba grupu vuneravel estadu buka ajuda grupu sira nee,” katak nia.
Nunee mos Prezidente CNE, Jose Agostinho Belo hatutan, konferensia nee hodi haree ba eleisaun parlamentar neebe mak halao iha 21 Maiu 2023, no eleisaun sai hanesan sasukat ida parte husi demokrasia.
Prezidente CNE hatutan, iha konferensia nee introdus oinsa eleisaun ida mai iha pas no harmonia nia laran tanba mesak Timor oan.
“Entau ita hakarak kampanha mai iha 19 Abril too rohan tenki ho liafuan sira dignu, liafuan sira neebe diak, liafuan neebe halo ita nia povu simu labele trauma, nunee iha eleisaun neebe halao 21 Maiu, objetivu ida mak nee, ita hakarak introdus, ita la halo kultura neebe sakrifika animal no sasan,” katak PR CNE.
Jose Husu lider partidu politiku nasional sae ba palku diak liu mak hatoo planu no programa deit, labele insulta malu.
Nunee mos sua Eminensia Dom Virgilio Kardeal do Carmo da silva, SDB hatutan, husi Kristu nia moris hias hatoo ba eskolante sira mak dame horik ho imi.
Partisipante neebe partisipa iha konferensia nasional Fraternidade Humana ba fator esensial no konsolidasaun pas no estaiblidade demokrasia mak hanesan Prezidente Republika Jose Ramos Horta, Arche Bispo Metropolitana Dili, CNE, STAE, Komandante F-FDTL, Komandante PNTL, ho membru sira, diplomata sira, reprezantante Igreza Protestante, Islamiku, estudante no partisipante seluk tan.
Nunee mos partidu politiku neebe hola parte iha komferensia nasional mak hanesan partidu politiku husi FRETILIN, CNRT, PR, PUDD, UNDERTIM, Os Verdes, PDN, PST, MLPM, CASDT, no partidu politiko neebe lamarka Prezensa mak hanesan PD, Khunto, PlPA, PLP, UDT.
(eme)
