DILI, STLNEWS.co – Prezidente Republika (PR), Jose Ramos Horta, husu politika nain sira labele konsentra deit ho eleisaun parlamentar neebe mak halao iha tinan 2023, maibe halao nafatin knaar ho diak no mantein dame iha rai laran.
Prezidente Republika, Jose Ramos Horta, hatoo kestaun nee ba jornalista sira bainhira remata halo vizita ba Servisu Autonomu Medikamentu no Ekipamentu Saude (SAMES), Kampu Alor, Dili, Segunda nee (01/08/2022).
Nia hatete, labele distraksi ho eleisaun 2023, konsentra ba ezekusaun orsamentu ba tinan ida nee nian no ezekusaun orsamentu nee tenki lao ho diak, tinan 2023 governu halo daudaun ona prioridade sei hatama orsamentu hahu diskuti, parlamentu aprova, normalmente iha fulan Dezembru depois fulan ruma ezekuta orsamentu.
“Nudar ema politika sei fokus mos ba iha eleisaun, mais hau husu mak nee, favor kaer imi nia knaar ho diak, tanba ho orsamentu boot estadu nia tinan 2022-2023, ekonomia difisil iha mundu laos iha Timor deit, tanba nee hau rasik halo esforsu tane governu, Maun Boot Xanana mos horiseik koalia ho diak, nia hatete, nia preokupasaun mak ida nee, mantein dame iha rai laran, husik governu avontade labele iha problema, tanba situasaun internasional difisil,” hatete PR Horta.
Horta hatutan, oras nee folin kontetor sae makaas, roo atu mai merkaduria difisil, no tempu badak sei muda ba portu foun iha fulan Novembru nee nia laran, Horta konsidera nee notisia diak ida, tanba portu Tibar estandar internasional.
(eme)
