DILI, STLNEWS.co – Prezidente Republika (PR) Jose Ramos Horta kondekora Medalha Ordem Timor Leste (TL) ba Yohan Goncalves, tanba durante nee lori TL nia naran halo kompetisaun desportu iha rai liur.
Prezidente Republika Jose Ramos Horta hatoo kestaun nee ba jornalista sira bainhira remata fo kondekorasaun ba sidadaun Yohan iha Palasiu Prezidente Bairu Pite, Kinta kalan (16/03/2023) hatete, Yohan Goncalves boot iha Fransa, maibe familia husi Goncalves nia hahu joven didika aan ba desportu makaas, liu-liu ba skil desportu iha Eropa neeba ho kompetisaun neebe diak tebes.
“Devia nia reprezenta Fransa, tanba nia sidadaun Fransa maibe nia reprezenta fali Timor, tanba fuan partense ba Timor, no kompetisaun TL barak los, laos agora deit, maibe tinan hira nia laran ona nia sempre ba ho bandeira TL,” katak PR Horta.
Prezidente hatete, rekonhesimentu ba Yohan nee hanesan agradesimentu ida ba nia, tanba durante nee lori Timor Leste nia naran hamorin ona iha mundu internasional.
Xefi Estadu hatete, atividade jogu internasional neebe mak reprezenta Timor iha rai liur, nee hanesan mos diplomasia internasional.
Aleinde nee, Yohan Goncalves hatutan, durante nee nia sempre reprezenta Timor Leste iha jogu internasional.
Iha biban nee, Yohan mos hatoo agradese ba Prezidente Republika Jose Ramos Horta, neebe rekonhese nia atividade iha rai liur hodi entrega medalha ba nia.
“Hau orgulhu hodi reprezenta nasaun husi hau nia ama nian neebe partense Timor Leste, no hau sempre lori bandeira Timor Leste hodi joga iha mundu, hau orgulhu ohin prezidente rekonhese no fo medalha Ordem TL ba hau, hau hatoo obrigadu ba prezidente,” katak nia.
Nunee mos Sekretariu Estadu Juventude no Desporto (SEJD), Abrao Saldanha hatutan, atleta Johan ba joga ho por meritu ho nia porifikasaun rasik, laos konvite, tanba nee nia merese fo medalha meritu husi estadu.
“Uniku Timor oan ida neebe konsege joga too Olimpicy por kualifikasaun mak Yohan Goncalves, restu ate a data ita sei partisipa ho por konvite, maibe Yohan ba ho porifikasaun,” katak SEJD.
(eme)
