DILI, STLNEWS.co – Prezidente Republika (PR) Jose Ramos Horta la konkorda ho lei radio divuzaun ba iha partidu politiku sira.
Prezidente Republika Jose Ramos Horta hatoo kestaun nee ba jornalista sira, bainhira remata halo inaugurasaun biblioteka Bento XVI, aleinde nee halo abertura mos ba Anu Akademiku UCT 2023 iha Salaun UCT Balide, Kuarta nee (15/03/2023).
“Hau seidauk simu, mais hau lee ona, hau iha preokupasaun boot ba ida nee, ida nee taka dalan fali ba partidu sira neebe laiha osan para iha sira nia televizaun no sira nia radio proiviu fali, televizaun ida privadu simu material kampanha, transmite materia kampanha partidu ruma ka kandidatu ruma nia, hau la konkorda ho ida nee iha TL ou iha mundu,” katak PR Horta.
Prezidente Republika hatete, iha rai seluk hanesan Amerika, Koreia, Japaun no nasaun seluk, total liberdade laiha ema keixa ba ida nee.
“Iha Timor tenki nunee, liberdade absoluta ba media, se media nee privadu, media nee mak halo desizaun, nia foti antena hira ba kandidatu sira, ba partidu sira labele regula fali mai husi lei, portantu hau la konkorda,” nia tenik.
Kualker lei iha Timor ka iha mundu bele, depois uza lei nee para trava liberdade imprensa, liberdade politika, i PR rasik seidauk lee lei nee ho kompletu.
Xefi Estadu hatutan, kestaun ida mak osan loke televizaun nee mai husi neebe? Serake mai husi subvensaun estadu nia ba partidu, entaun subvensaun estadu nia neebe mai partidu nee konstitusional legal etniku para loke fali televizaun partidu nia, signifika estadu mak submesiona fali televizaun partidu nia.
“Lei nee divia hatete osan neebe mai husi submesaun estadu labele uza para kria radio no televizaun partidu nia, teorikamente bele hatete partidu 10 entaun tenki iha televizaun 10 no radio 10 nee teorikamente hau ladun konkorda ho ida nee, hau sei lee didiak hodi sei asina promulga ou veta,” katak nia.
(eme)
