DILI, STLNEWS.co – Bankada FRETILIN iha Parlamentu Nasional (PN) konsidera durante asumi pasta hanesan Xefi Estadu, Jose Ramos Horta nia kadeira iha Palasiu Prezidensia Aitarak-Laran mamuk, iha deit aviaun leten semo ba mai nasaun sira, maibe laiha rezultadu husi viajen nee ba situasaun ekonomia no politika iha Timor Leste.
“Kadeira prezidente nian iha deit aviaun leten, hau haree buat nee seriu mak nee, ita fo deit mak nee, fo ba, prezidente nia kadeira iha Aitarak-Laran nee mamuk tinan tomak, komesa husi sai prezidente too ohin, ita atu fo tan ona nia atu sai hela deit, ita presiza hatene efeitu husi viajen sira despeza estadu,” dehan Deputadu Bankada FRETILIN, Joaquim dos Santos Borroluli, durante intervensaun iha plenaria, Tersa nee (29/08/2023) iha PN.
Borroluli hatete, liga ba diplomasia Ministeriu Negosiu Estranjeiru nian nee saida, efeitu ba governu ninia obrigasaun nee saida iha kooperasaun, sai dala ida osan hira mak tama mai Timor, sai dala-rua subsidiu saida mak mai Timor ba ekonomia no situasaun politika.
“Laos sai deit, povu hili nia nee atu tur iha Aitarak-Laran laos sae aviaun semo ba semo mai deit, ita iha obrigasaun, nia mos iha obrigasaun ba estadu ida nee, ita respeita nia kompetensia neebe Konstituisaun fo Xefi Estadu nee, ita respeita, mais ita mos tenki hatene rezultadu husi nia knaar husi ba vizita nee, ida foin ba Jakarta nee rezultadu saida mai Timor, vizita privadu ok, agora vizita ofisial sira nee pelu menus iha informasaun ruma mai parlamentu nee katak, vizita ida nee nia efeitu politiku no ekonomiku mak nee,” hatete nia.
Timor agora enfrenta hela problema ida, Mianmar espulsa Diplomata Timor oan iha neeba, serake Prezidente Republika nia viajen agora ba bele rezolve problema ida nee, ka iha buat seluk la hatene.
Nunee mos Xefi Bankada CNRT, Duarte Nunes hatete, pedidu asentimentu viajen Prezidente Republika ba Havana Cuba ho Nova Yorke Estadus Unidos Amerika, iha deskolasaun dala ida deit, tanba hahu iha loron 12 too 24 fulan Setembru mak foin fila.
“Nia esplikasaun atu ba neeba nee kestaun ketak, para konvense deputadu sira mas nia intensaun nee hahu iha loron 12, PR sai husi Timor nia la fila ona too iha loron 24 mak fila fali, tanba asentimentu nee ba loron 12 too 16 iha Havana Cuba no pedidu asentimentu ida fali, ba Nova Yorke Estadus Unidos Amerika iha 17 too 24 fulan Setembru, entaun Xefi Estadu sai too loron 24 mak nia fila,” esplika Duarte Nunes.
Nia sublina, vota ba pedidu asentimentu nee ba Xefi Estadu nia deskolasaun ida deit, nia esplikasaun ba fatin, neebe para konvense deputadu sira katak, PR ba duni servisu ida nee nia esplikasaun mak nia deskolasaun nee ida deit.
Enkuantu Parlamentu Nasional, aprova pedidu asentimentu deskolasaun, Prezidente Republika Jose Ramos Horta ba Havana Cuba, hodi partisipa iha Simeira G77+ loron 12 too 16, ho votu afavor 56, kontra 0 no abstensaun 0.
Nune mos pedidu viajen ba Nova Yorke Estadus Unidos Amerika, 78 sesaun Assembleia Jeral da Organizasaun Nasoens Unidas (ONU), iha 17 too 24 fulan Setembro tinan nee ho votu afavor 56, kontra 0 no abstensaun 0.
(dom)
