PR Rekomenda Governu Rezolve Problema Timor Oan Iha Rai Liur

DILI, STLNEWS.co – Prezidente Republika (PR) Jose Ramos Horta rekomenda ba iha governu atu rezolve problema neebe Timor oan sira hasoru iha rai liur liga ho pasaporte.

Prezidente Republika Jose Ramos Horta hatoo lia hirak nee ba jornalista sira, bainhira fila hikas mai Timor Leste iha Aeroportu Internasional Nicolao Lobato, Kuarta (07/02/2024).

Nia rekomenda, diak liu pasaporte nee validu labele too tinan 5 deit, maibe bele too tinan 10.

“Hau espera Ministru Justisa halo buat neebe hau rekomenda tiha ona, no hau rekomenda ona ba Primeiru Ministru para haree iha fatin neebe iha Timor oan lubuk ba lubuk rihun ba rihun iha Inglatera, iha Korea do Sul, iha Australia, iha ita nia embaixada iha neeba monta ita nia ekipamentu modernu neebe iha para iha neeba iha eleisaun ba pasaporte, nee mak hau rekomenda. Hau espera ida nee mak sira halo, no halo urjenti tanba orsamentu iha ona,” katak PR Horta.

Prezidente Republika hatete, pasaporte labele prazu ba tinan 5 deit, no tanba saida tau deit too tinan 5. Horta rekomenda validu bele tau too tinan 10, nunee estudante no trabalhador sira labele gasta osan lao ba oin hodi trata dokumentus.

“Sira neebe iha governu la hanoin didiak iha kakutak. Purezemplu estudante sira ba Indonezia ka ba neebe deit, sira trata deit pasaporte mos tinan ida liu mak foin hetan, depois hein tan viza atu ba universidade tau naran ba mai, entau liu ona tinan 2, pasaporte hela deit ona tinan 3, tanba nee hau hatete favor hanoin didiak antes halo desizaun ruma, pasaporte fo validade ba tinan 10, signifika gasta osan menus ba estudante sira la ulun fatuk moras ba buat sira nee, hau espera pasaporte expire ba tinan 10 nee urjenti,” katak nia.

Xefi Estadu hatete, Timor oan neebe servisu iha rai, liur-liu liu Inglatera, Korea no seluk hatama osan US$ 110 milhoens, tanba nee husu governu presiza iha hanoin hodi trata sira dignu.

(eme)

LEAVE A REPLY

Please enter your comment!
Please enter your name here