DILI, STLNEWS.co – Bankada Partidu Libertasaun Popular (PLP) iha uma fukun parlamentu Nasional (PN) afirma, prosesu perde mandatu ba Deputadu Cornelio Gama L7 tenki akontese, maski agora sei iha prosesu nia laran.
Tuir Deputada Bankada PLP, Maria Angelina Lopes Sarmento dehan, relasiona ho prosesu perde mandatu ba Deputadu Cornelio Gama L7, ida nee iha prosesu nia laran.
Hau seidauk bele informa konaba ninia lalaok sira, maibe nee tenki akontese, tanba deputadu ida mai tur iha nee, isin lolon mak reprezenta PLP, maibe ulun halai ba partidu seluk nee labele,” dehan nia ba jornalista sira iha PN, Segunda nee (24/04/2023).
Nia afirma, para mais nia hanesan lider Bankada PLP, nia reprezenta hanesan fizika deit, mais nia ulun halai ba partidu seluk nee labele, no etika politika nee la diak, tanba nee prosesu ida nee sei lao hela.
Nia hatutan, maski agora daudaun seidauk bele pronunsia, maibe PLP sei halo duni iha tempu badak, tanba iha funsionamentu ho maneira hanesan nee susar atu tau ba ajenda hodi realiza prosesu perde mandatu.
(dom)
