DILI, STLNEWS.co – Deputadu sira husi bankada opozisaun preokupa ho Orsamentu Retifikativu (OR) mai debate iha Parlamentu Nasional (PN), maibe fundu infraestrutura hetan kortes kuaze US$ 25 milhaun.
Preokupasaun nee hatoo husi Deputadu Bankada FRETILIN, Dario Madeira ba loron dahuluk, Tersa nee (22/08/2023) iha PN.
Nia hatete, Orsamentu Retifikativu mai nee hetan kortes makaas iha fundu infraestrura, oinsa ho projetu sira neebe lao hela, balu iha prosesu aprovizionamentu. Povu durante nee hein hela atu asesu ba infraestrutura liu-liu estrada, maibe osan koa hotu.
“Orsamentu mai hetan kortes makaas liu-liu fundu infraestrutura kuaze US$ 25 milhaun. Nee orsamentu neebe durante nee povu hein hela, tanba bele fo benefisia direta ba povu iha infraestrutura, maibe osan nee koa hotu”, nia tenik.
Nia lamenta koa osan boot hanesan nee prejuizu ba estadu ka lae, oinsa projetu sira lao hela, balu iha hela parovizionamentu prosesu lao ona, tribunal das kontas fo vistu ona, hanesan aeroportu Nicolao Lobato, estrada Baukau ba Baguia no Kelikai.
Nunee mos estrada sira neebe hetan emprestimu, Baukau no Venilale, maski prosesu lao ona, maibe estrada Venilale ba Vikeke prosesu lao hela iha fatin, tanba kompanhia lokal mak trava prosesu kuaze tinan 10 resin.
Nia hatete, uluk Primeiru Ministru VIII Governu koalia ho diretor kompanhia katak, laiha kapasidade atu servisu ho lais, no fo tempu ba nia fulan 6 atu konklui servisu, maibe la konsegue, tanba nee hapara nia.
Ikus mai ho IX Governu atu halo avaliasaun tau buat hotu tuir nia dalan ho proseseu diak liu garante projetu sira iha kraik fo fali lampu verde ba kompanhia nee halo servisu, ida nee lamentavel. Povu Vikeke nee iha direitu atu goja osan emprestimu, tanba kompanhia nebee halo estrada nee 100 kilo metru.
Reprezentante povu nee husu esplikasaun husi governu, tanba povu bele kontente, laos nee deit maibe projetu Uma Naroman ba Povu hetan kortas total dehan atu halo avaliasaun, uma naroman ba povu benefisiu direta ba povu kbiit laiha, neebe labele halo uma.
Nunee mos Visi Bankada CNRT Patrocino Fernandes hatete, konaba korte fundu infraestrutura, iha audensia governu esplika katak, Agostu nafatin tau orsamentu boot iha fundu infraestrutura, maibe depois la ezekuta, tanba fundu nee liga ba projetu boot sira, projetu sira nee prosesu ezekusaun lao ba iha tenderizasaun aprovizionamentu lori tempu.
Nia hatete, osan nee tau hela iha neeba, toba hela mos governu hela fulan hira deit ona remata ezekusaun orsamentu ba tinan 2023 mos sei la halo tenderizasaun no aprovizionamentu.
“Governu esplika ona katak, projetu neebe lao no uma naroman ba povu prosesu mos lao hela, i tama ona komitmentu osan la book, sei kontinua lao”, katak Patrocino.
(gui)
