DILI, STLNEWS.co – Relasiona ho akontesimentu tuda malu iha kampanha Partidu CNRT iha Munisipiu Vikeke, too rezulta militante CNRT ida kanek, presiza investiga hodi hatene nia motivu.
Tuir Prezidente Komisaun B, trata asuntu Negosiu Estranjeirus, Defeza no Seguransa Jose Agustinho Somotcho katak, seidauk hatene tanba saida akontese tuda malu, maski CNE ho seguransa antes kampanha apela atu parpol hotu tenki koalia programa, maibe ses husi ida nee hanesan provokasaun.
Nia parte ladun akompanha kampanha CNRT nian, maibe akontesimentu nee presiza kondena, maibe tenki buka hatene motivu.
“Publiku dehan, militantes FRETILIN mak tuda, nee hau hanesan militantes FRETILIN, labele kondena hau nia aan, maibe presiza investigasaun mak hatene”, katak Deputadu Jose Agustinho Somotcho ba STL Segunda nee (24/07/2023).
Nia kestiona, publiku bele dehan militantes FRETILIN mak tuda, maibe ita seidauk iha faktus ka halo investigasaun, tanba nee entrega ba iha CNE ho seguransa atu halo investigasaun.
Prezidente Komisaun B nee hatete, tuir loos iha kampanha koalia programa, maibe karik povu la simu mak tuda, presiza hadia, maibe karik iha provokasaun ruma, ida nee parpol sira mos tenki evita linguajen provokativu.
Nia hatete, FRETILIN hanesan mos partidu hotu, se karik FRETILIN halo kampanha mak lider koalia insulta bele mos hetan tuda, tanba nee husu ba lider parpol sira iha kampanha hatoo deit programa, atu nunee ba ukun bele halao.
Iha parte seluk, Dionisio Babo hanesan Prezidente Diretiva Nasional CDN, hanesan mos portavos kampanha nasional, Partidu CNRT, liu husi konferensia imprensa hatete, situasaun jeral kampanha CNRT iha Munisipiu 3 hanesan Manatutu, Vikeke nomos Baukau. Kampanha ba dala uluk iha Manatutu lao diak, ho ema hotu kuadrus, militantes simpatizantes CNRT nian husi postu administrativu hotu inklui mos sira neebe iha loron tuir mai iha Laleia, rezista laiha akontesimentu ruma, tanba nee CNRT hakarak felisita no louva partisipasaun hotu-hotu nian neebe kria situasaun pas, kalma iha Manatutu no Laleia.
“Ami keisa ona i prosesu formal sei hatoo liu husi partidu ekipa legal hodi bele hetan no husu ba parte relevantes atu halo investigasaun”, katak Dionisio.
Nia dehan, sira husu mos ba orgaun eleitoral sira hanesan CNE ho seluk tan atu rezista diak kazu violensia sira nee, se bele fo sansaun forti ba partidu neebe mak nia militantes la respeitu demokrsai iha rai laran no la hatudu asaun edukativu hodi eduka militantes sira.
CNRT Hatoo solidaridade ba familia vitima no husu pas no estabilidade, mantein nafatin atu kampanha lao too hotu.
(gui)
