DILI, STLNEWS.co – Parlamentu Nasional (PN) husu investigasaun ba Uma Naroman ba Povu (UNP) neebe remata ona, maibe la kompleta ho material uma laran.
Deputadu husi Bankada CNRT, Natalino dos Santos hatete, Uma Naroman ba Povu IX Governu dehan kansela lai, atu haree fila fali, halo estudus no investigasaun depois mak kontinua. Maibe neebe mak uluk implementa tiha ona, material balu iha no balu laiha, nee presiza investiga.
“Konaba UNP, tinan kotuk balu iha material uma laran, balu laiha material, ida nee tenki haree, halo investigasaun, tanba saida uma nee halo nia komplementar uma laran laiha, tanba orsamentu nee husi uS$ 13-17 mil, husi nee inklui iha item nee ka lae, se la inklui mak la tau tenki investiga”, katak Deputadu CNRT Natalino dos Santos ba STL, Tersa nee (19/09/2023) iha Parlamentu.
Nia dehan, iha investigasaun husu responsabilidade ba responsavel neebe kaer projetu nee.
Enkuantu, ba sira neebe mak implementa tiha ona, lo-loos tenki kontinua, tanba orsamentu katak transferensia tiha ona ba konta bankaria suku sira.
Liga ba kestaun hirak nee mak IX Governu hapara hela konstrusaun nee, hodi halo invstigasaun no avaliasaun, nunee prosesu bele lao diak hodi fo garantia no esperansa ba povu hodi hetan uma mahon.
Tuir nia, fiskaliza nee deputadu sira, maibe atu halo monitoriza nee, Ministeriu Administrasaun Estatal mak tenki monitoriza hodi haree prosesu nee, se material laiha tanba saida, tanba konstrusaun lao orsamentu mos iha ona.
Nunee mos Deputadu husi Bankada KHUNTO, Luis Roberto hatete, konaba UNP nee, programa VIII Governu, i uma nee povu simu nee kontenti, tanba uma nee bele senti katak dignifika povu.
Maibe IX Governu mai trava, katak sei halo auditoria husi tribunal das kontas ba implementasaun UNP nee i prosesu nee lao hela, oinsa atu bele ativu fali.
Uma daudaun nee iha territoriu laran lao, maibe abandona hela, maski konstrusaun balu atinji ona 50%, balu liu husi nee, maibe abandona ho razaun laiha orsamentu.
Tuir nia, IX Governu sei trava hela, hein auditoria, fiar katak depois auditria iha ona rezultasu IX Governu mos sei konstinua konstrusaun nee, tanba UNP nee diak ba povu.
(gui)
