DILI, STLNEWS.co – Presiza halo investigasaun klean ba kazu sira neebe akontese iha loron finadu liu ba, tanba kazu nee afeta ba atividade normal komunidade, inklui rezulta uma komunidade hetan sunu no ema balu hetan kanek.
Kestaun nee hatoo husi Xefi Bankada PLP, Maria Angelina Sarmento katak, Parlamentu Nasional (PN) kondena makas aktus violensia krimi neebe akontese iha loron finadu liu ba nee, maibe seidauk bele espekula loos katak, hun husi kazu nee mai husi Arte Marsiais ka husi konflitu etniku ka husi buat seluk.
“Ita hein husi rezultadu investigasaun mak hatene loos, nia hun no abut mai husi neebe, tanba nee tenki iha investigasaun klean, tanba aktus neebe iha afeta ba ema seluk nia vida, afeta ba ema nia normalidade movimentu ba sira nia atividade loron-loron, liu-liu ba komunidade agrikultor toos nain, natar nain, sira laiha liberdade atu ba toos ho natar”, katak Xefi Bankada PLP, Maria Angelina Sarmento ba STL iha PN, Tersa nee (07/11/2023).
Tuir nia, haree ba krimi sira hanesan nee tenki atua ho agresivu oituan, atu eduka katak, laiha fatin ba TL atu hakiak kriminozu sira iha rai Timor.
Tanba nee iha investigasaun mak bele hatene, maibe nia parte haree autoridade seguransa sei failla atu detekta, fatin ameasa no risku ba konflitu, liu-liu ba intelejensia sira, tenki haree ida nee. Nunee antes problema nee sai boot, ema hatene ona fatin neebe mak sai risku ba konflitu, nunee seguransa bele mantein seguransa. Maibe buat sira nee laiha, tanba nee derepente deit konflitu nee mosu, uma komunidade barak hetan sunu no ema barak hetan kanek, tanba nee komunidade sira tenki refuzia fali ba fatin neebe seguru.
Nia husu ba Ministeriu Interior, Servisu Nasional Intelijensia (SNI), halao knaar ho seriu, nunee tempu loron boot detekta no hatene ona fatin sira neebe bele prevene konflitu duke akontese mak foin kura.
Entretantu, Provedoria Direitus Umanus no Justisa (PDHJ), Virgilio da Silva Guterres ‘Lamukan’ hatete, haree ba problema sira neebe akontese, kompetensia neebe PDHJ halo mak investigasaun, depois halo notisia ba krimi, se kazu nee involve krimi, nee haruka ba Ministeriu Publiku (MP).
Tuir nia, investigasaun ba kazu sira nee, servisu neebe mak durante nee PDHJ halao, tanba nee PDHJ sei halo mos investigasaun ba kazu sira nee atu haree.
(gui)
