DILI, STLNEWS.co – Komunidade iha Kapital Dili laiha konsiensia kuidadu uza bee moos, husik bee moos estraga, maski ema seluk halerik hela ba bee moos, tanba nee presiza kontrola.
Preokupasaun nee hatoo husi Deputadu Mateus Carvalho husi Bankada CNRT katak, koalia konaba bee moos, maibe parte relevante haluha tiha atu kontrola bee moos, tanba komunidade sira mos uza bee moos la kuidadu.
“Bee mai komunidade sira uza tuir hakarak, laiha konsiensia atu poupa ka maneja bee, nunee ema seluk bele uza, husik bee sai estraga”, kestiona Deputadu Mateus Carvalho husi Bankada CNRT, Tersa nee (01/08/2023) iha PN.
Nia dehan, haree iha Dili laran komunidade sira uza bee la hanoin atu taka torneira hodi bee sirkula fali ba ema seluk, maibe sira husik deit halo bee moos sai estraga.
Tanba nee husu ba autoridade lokal sira atu kontrola uza bee moos husi komunidade sira, oinsa maneja bee hodi ema seluk mos asesu bee.
Nunee mos Prezidente Parlamentu Nasional, Maria Fernanda Lay hatete, agora komunidade sira uza bee sei gratuitu, tanba nee uza tuir sira nia hakarak, ba oin kuandu selu ona foin hakfodak.
Entretantu, komunidade Tasi Tolu Hermina Oliveira hatete, sira uluk kedas laiha bee moos, bee moos neebe sira konsumu nee sosa deit.
Tuir nia, bee iha duni, maibe bee masin, tanba nee husu ba IX Governu neebe lidera husi Xanana atu haree mos bee moos ba komunidade Tasi Tolu.
Tanba atu asesu bee moos tenki sosa, maibe osan iha mak sosa, osan laiha sira susar bee moos.
(gui)
