DILI, STLNEWS.co – Mudansa klimatika hamosu udan no anin boot iha fulan hirak liu ba, destroi estrada no ponte iha Munisipiu Manufahi barak estragus. Too agora seidauk normaliza, tanba nee presiza projetu emerjensia, se lae tempu aumenta grave liu tan.
Preokupasaun nee hatoo husi Deputadu Bankada PD, Manuel Henrique Noronha katak, situasaun klimatika neebe halo udan boot, rezulta estrada barak aat iha teritoriu laran, liu-liu iha Munisipiu Manufahi barak estragus. Agora iha Setembru la kleur tan tama Dezembru udan sei boot tan, sei tama too Junhu tinan oin, durante fulan 5 ou 6 aat liu tan, bainhira laiha projetu emerjensia.
“Agora estrada ho ponte lubuk ida aat, husu Ministeriu relevante atu haree projetu emerjensia hadia lalais estrada no ponte iha tempu badak, se hein prosesu tenderizasaun mak implementa, tarde too Dezembru udan aumenta nee aagrave liu tan”, preokupa Deputadu husi bankada PD, Manuel Henrique Noronha ba jornalista Kuarta (06/09/2023) iha PN.
Nia dehan, IX Governu foin daudaun debate Orsamentu Retifikativu (OR) pasa ho programa lubuk ida, maibe atu halo projetu dehan hein tender mak implementa, hodi hadia estrada ho ponte ida nee difikulta boot.
Iha Manufahi hanesan iha Maubisi ba too Same iha estrada no ponte lubuk ida mak aat.
Nia lamenta, liu-liu ponte ida iha Same-Vila nee rai monu mesak, nee mak hein kleur tan mak udan mai tan, sei difikulta liu tan movimentu transporte, i difikulta mos komunidade no estudante sira.
Tanba nee husu ba ministeriu relevante atu atu halo emerjensia porejetu hodi haree ba estrada iha Manufahi.
Tuir nia, kondisaun estrada ho ponte laos deit iha Manufahi, maibe iha territoriu laran, tanba nee husu Ministeriu Obras Publik (MOP), atu haree prosesu lalais ba kondisaun estrada ho ponte neebe hetan estragus husi udan iha fulan hirak liu ba.
(gui)
