DILI, STLNEWS.co – Prezidente Republika Jose Ramos Horta enkontru ho nia omologu husi Uniaun Emiradu Arabe (UEA), Liurai Sheik Mohamed Bin Zayet Al Nahyan, iha nia rezidensia ofisial Qasr Al Shati iha sidade Abu Dhabi, hodi diskuti konaba area kooperasaun oin-oin neebe nasaun rua nee sei halao hamutuk iha futuru.
“Timor-Leste iha relasaun amizade kleur ona ho UEA, maibe seidauk iha akordu ofisial ho Timor-Leste. Agora mak hau komesa buka loke odamatan sira-nian atu aumenta kooperasaun ho Timor-Leste,’’ esplika Prezidente Horta hafoin enkontru ho Xefi Estadu UEA, liu husi komunikadu neebe STL asesu husi Prezidensia Republika, Sabadu (14/10/2023).
Nia hatete, area pertinente sira neebe Timor Leste hakarak halo kooperasaun bilateral ho UEA, tuir Prezidente Horta, mak investimentu iha setor ekonomia no haforsa kooperasaun diplomata.
Nunee Xefe Estadu konfirma liu tan katak, “Timor presiza iha infrastutura otelaria ho standart fitun 5, tanba ita atu tama ASEAN, sei simu bainaka lubuk ida, no halao reuniaun oin-oin inklui sentru konvensaun, tanba nee investimentu ne’e importante,’’ dehan Prezidente Horta.
Infrastrutura hirak nee ba UEA, prontu atu investe ho modalidade (maneira investimentu) tolu, UEA oferese deit ou fo empresta osan ba Timor no ikus liu halo Invetimentu Públiku Privadu.
Aleinde investimentu iha area infratutura, UEA mos aprezenta nia kompromisu atu apoiu iha enerjia renovavel hodi ajuda minimiza kustu operasional iha eletrifikasaun atual.
Prezidente Horta mos aprezenta nia pedidiu konaba harii rezidensia estudante universitaria hodi fasilita estudante sira hosi munisípiu mai eskola iha kapital Dili, tanba konsidera uma-aluga (kos ) kuaze iha kondisaun mínimu.
Aprezentasaun nee hetan apresiasaun no konkordasia husi Prezidente UEA, Sheik Mohamed bin Zayet Al Nahyan no tempu badak Estadu Timor Leste sei identifika rai no sei formaliza hodi realiza planu hirak nee,” katak Horta.
Xefi Estadu Horta mos haktuir liu tan, “UEA mos bele halo investimentu iha area pekuaria liu-liu hakiak rusa hosi esporta inklui koalia konaba dezenvolvimentu iha area agrikultura,’’ tenik Prezidente Horta.
Investimentu hotu-hotu presiza kondisaun, liu-liu lei ba protesaun ba investimentu neebe nasaun barak adopta no dupla atributasaun no tribunal arbitrajen.
Importante ba Timor-Leste atu dada investor husi rai seluk, mak estatutu rai mezmu iha difikuldade maibe Prezidente Republika konsidera empregu importante.
Ikus lius, Prezidente Horta relata mos prossesu estabelesimentu embaxada foun iha Dubai (UEA) neebe oras nee dadaun Primeiru-Ministru Kay Rala Xanana Gusmão fo kompetensia tomak ba Ministru Negosiu Estranjeiru Timor-Leste hamutuk ho Prezidensia Republika hodi formaliza estabelesimentu embaixada nian.
Entretantu, akompanha iha vizita estadu nee, MNEK Timor Leste, Bendito Freitas, Embaixador Nelson Santos no Amorin Vieira inklui delegasaun sira seluk.
(eme)
