DILI, STLNEWS.co – Prezidente Universidade SEHAN ho delegasaun halo enkontru ho Prezidente Republika (PR) Jose Ramos Horta, Korea prontu loke dalan apoiu Timor oan neebe iha Korea, hodi tuir kursu iha programa industria no teknolojia.
Lia hirka nee hatoo husi Prezidente Universidade SEHAN Korea do Sul, Yi Sunghoan ba jornalista sira iha Palasiu Prezidente Bairo Pite, Segunda (10/07/2023).
Nia hatete, kontenti tebes hasoru malu ho PR Horta hodi koalia konaba Universidade SEHAN.
“Ami ohin koalia ona konaba programa Universidade SEHAN ho Sua Exelensia Prezidente, no ami senti obrigadu ba ninia domin ba nia nasaun, ami koalia ona buat hirak konaba programa universidade nia lalaok ho nia prosesu, ami hakarak loke dalan ba estudante Timor-Leste ba servisu iha Korea ho kursu ba programa industria no teknolojia,” dehan nia.
Prezidente Universidade SEHAN afirma, sira komprimidu no prontu apoiu Timor oan, oinsa mak bele halao mos estudu iha Korea.
Nia hatutan, sira mos koalia hela ho Ministeriu Edukasaun iha sidade Jeowanan-do, konaba programa ensinu sekundariu depois sira remata sira bele ba iha Korea liu husi programa bolsu estudu. Programa ida nee diak ba estudante sira, kuandu sira tama iha Korea sira hetan D2 hanesan vistu estudante ba graduasaun. Tinan 4 nian sira bele kontinau ho F2 ba trabalhador sira, vistu ida nee ba vistu rezidensia permanete hotu, ida nee oportunidade diak tebes ba estudante sira hodi bele hetan sira nia moris.
Iha biban nee, Prezidente Republika Jose Ramos Horta hatete, senti kontenti hasoru malu ho Prezidente Universidade SEHAN Korea do Sul, Yi Sunghoan ho delegasaun, no prezidente mos prontu atu ba vizita eskola iha Korea iha tinan oin.
(eme)
