Problema Mina Sempre Akontese, Governu Foun Bele Rezolve

DILI, STLNEWS.co – Xefi Bankada CNRT, Deputadu Duarte Nunee iha uma fukun Parlamentu Nasional (PN) afirma, problema mina neebe laiha, situasaun nee sempre akontese beibeik, espera governu foun mai labele halo tuir situasaun nee.

“Mina laiha, situasaun nee akontese beibeik ona, maibe hori bainrua hau haree iha televizaun katak, Pertamina Esperansa Timor Oan (ETO) sei garante supply mina mai, ita espera sira komprende situasaun para labele hamosu fali individu, depois hodi faan fali ho presu ida neebe ema obriga aan tenki hola, nee esperensia ida, no espera katak governu tuir mai labele halo tuir,” dehan nia ba jornalista sira iha PN, Sesta nee (09/06/2023).

Nia dehan, maibe oinsa ninia maneria, governu tuir mai atu halo, hein deit, tanba agora governu foun seidauk forma no programa mos seidauk mai, too tempu programa mai mak foin bele hatete.

Nia tenik, situasaun nee espera katak, emprezariu sira mos tenki hanoin ka haree ba dook para labele aproveita situasaun sira hodi faan fali ba ema individu balun, depois faan tutan fali nee ladun diak.

Nia afirma, espera emprezariu sira nee komprende situasaun, labele esplora fali iha situasaun sira hanesan nee.

Duarte sublina, relasiona ho autoridade ANPM inklui Timor GAP sira mos parese iha fornese mina tuir buat neebe pesoal hatene, nain 2 nee mak agora iha Dili laran, karik sira iha estasaun mina ruma iha munisipiu sira iha ligasaun, sira fornese ba malu, la hatene tanba sa sira seluk labele hola, fo deit ba sira nia empreza sira neebe sira tau iha munsipiu ou fatin-fatin sira iha Dili.

Duarte hatutan, liga ho mina neebe faan iha dalan sira ho nia presu sae, ida nee ema ruma mak kria situasaun hanesan nee hodi ema aproveita, keta nee mai pur akazu ka planeadu, maibe espera sira parte kompotente, liu-liu parte sira komersiu nian haree took, buka koalia ho empreza sira neebe iha mina hodi labele hamosu situasaun hanesan nee hodi aproveita.

Nunee mos, Xefi Bankada FRETILIN, David Mandati hatete, lamentavel tebes ho situasaun ida nee, oinsa mak konbustivel laiha iha estasaun konbustivel sira, mais eceran faan iha liur nee iha fali ho nia litru oituan hela ho presu US$ 6, nee halo konfuzaun oituan.

“Nee krizi ida neebe ita tenki ezije, ba se mak responsabiliza ba buat sira nee, keta halo iha nee hanesan halo komersiu ninian, depois sira faan ho karun liu karik, nee halo susar povu, no ema hotu-hotu lamentavel i intolerada,” dehan nia.

Nia afirma, ba pesoal senti konfuzaun boot mak konbustivel ba faan iha dalan iha, mais iha fali estasaun konbustivel laiha fali, nee oinsa mak nee, nee presiza iha peskiza ida lalais tebes para depois haree tuir se mak halo buat sira hanesan nee.

Nia hatutan, tanba nee determina ema nia atividade ekonomiku no atividade sira seluk boikota total hotu, estadu ida mak sai tiha fali kedas hanesan nee, presiza tenki halo kontrolu lalais.

(dom)

LEAVE A REPLY

Please enter your comment!
Please enter your name here