Programa UNP Hein 2025

DILI, STLNEWS.co – Relasiona ho programa Planu Nasional Dezenvolvimentu Suku (PNDS) halo Uma Naroman ba Povu (UNP), ba tinan 2024 seidauk iha projetu foun, tanba orsamentu 2023 sei iha no konstrusaun balu seidauk finaliza, tanba nee projetu foun hein 2025.

Informa Diretor Jeral Dezenvolvimentu Lokal (DGJDL), Jose M. S. Soares ba STL iha nia knaar fatin Bebora, Kinta (04/01/2024).

“Tanba nee, depois 2024 ba fali iha tinan 2025 mak foin bele aloka fali orsamentu ba PNDS iha programa UNP. Neebe atu dehan programa ida nee importante tebes, neebe governu fo atensaun, maibe tanba orsamentu 2023 nian sei iha, tanba nee 2024 la tau osan, hein 2025 mak governu foin bele tau osan. Iha ami nia monorizasaun iha terenu iha uma UNP nee barak mak seidauk konstrui too balun konstrusaun lao hela maibe seidauk finaliza, i iha balu mos paradu hela, tanba nee la kontinua aloka osan”, hatete Diretor nee.

Diretor nee husu ba PNDS atu finaliza tiha programa UNP nee iha 2024, nunee iha 2025 bele hahu fali foun. Enkuantu konaba dadus, konstrusaun ba uma hira mak finaliza, hira mak seidauk finaliza, i hira mak sei konstrusaun lao, ida nee ekipa teknik sira iha hela terenu elabora hela iha munisipiu hotu. Maibe PNDS rasik mos iha ona sekretariu ezekutivu, neebe atu klaru liu konaba dadus bele konfirma.

Aleinde nee konaba programa P_MOPA, uluk governu tau osan kada postu administativu, governu aloka US$ 6 mil, maibe ba tinan 2024 nee mos governu la aloka osan, tanba haree ba programa nee ladun iha benefisiu, nunee suspende tiha, kona fali ba P_MOHA mos hanesan uluk aloka orsamentu ba suku neebe seleksionadu aloka US$ 22 mil kada suku, maibe no fim iha suku balu deit mak implementa too remata, seluk nee seidauk, iha hela prosesu konstrusaun, maski sira nia konstrusaun seidauk finaliza, maibe governu transfere hotu ona orsamentu ba sira nia konta bankaria, maibe atu foti osan nee presiza asinatura husi Xefi Suku, Administrador Postu, depois mai too diretor jeral aprova foin bele foti.

Tanba nee, ba suku hirak neebe mak konstrusaun seidauk finaliza ka paradu hela nee labele foti lai orsamentu nee, hodi hein fali orientasaun foun mak Diretor Jeral Dezenvolvimentu Lokal liu husi Sekretaria Estadu Dezenvolvimentu Lokal nian, nunee sira bele gasta fali osan neebe iha hela konta bankaria.

Nia informa, se osan nee seidauk transfere ba kontak suku nian bele fo fila ba estadu, maibe tanba transfere tiha ona, tenki buka maneira seluk hodi finaliza, se iha ema ruma la implementa ho diak mak osan nee lakon deit ka akontese mal gastus nee sei submete ba investigasaun. Maibe iha monitorizasaun iha terenu suku sira balu la implementa, maski sira husu atu foti osan, maibe seidauk bele, tanba sei hein fali orientasaun foun.

(gui)

LEAVE A REPLY

Please enter your comment!
Please enter your name here