Projetu Emerjensia Iha Manufahi Lao Lentu

DILI, STLNEWS.co – Projetu emerjensia iha Munisipiu Manufahi lao lentu, maski daudaun nee atu tama ona ba udan boot.

Lia hirak nee hatoo husi Deputadu Bankada FRETILIN, Antoninho Doutel Sarmento katak, risku dezastre halo projetu emerjensia sira iha munisipiu too ohin loron paradu hela.

“Asuntu ida nee hau foti mos iha tinan kotuk, maibe too agora nafatin hela, hanesan iha dalan ba Same, iha Lihu-Lolo nian nee, ponte iha neeba sira halo kiik oan deit, la sukat katak udan boot mai korente mota bele liu, ida nee ponte sira nee bele estraga fila fali, i sira halo ponte nee tidin hela, husik hela deit”, preokupa Deputadu FRETILIN, Antoninho Doutel Sarmento iha parlamentu, Kuarta (10/01/2024).

Nia dehan, governu liu husi Ministeriu Obras Publik (MOP) atu atensaun lalais ba projetu sira nee, tanba hau iha Same haree projetu nee la book.

Entretantu Visi Ministru Asuntu Parlamentares Aderito Hugo dehan, konaba projetu emerjensia neebe halo iha tinan kotuk, andamentu lentu, ida nee loos duni.

“Ami rekonhese obra emerjensia iha tinan kotuk balu lao lentu los, hanesan iha ponte Abatu iha Same, kuandu udan atu mai no mota atu tun ona, maibe pilar ba ponte nee mos seidauk konstrui”, katak Aderito.

Nunee mos iha munisipiu no fatin seluk tan, la hatene setor privadu sira neebe involve iha obra sira nee mak falta konhesimentu ou falta tekniku atu adianta obra emerjensia sira. Maibe governu rezista ida nee no sei envia ba ministeriu relevante atu haree, resposta ba obra sira neebe mak emerijensia maibe lao lentu loos.

(gui)

LEAVE A REPLY

Please enter your comment!
Please enter your name here