Proposta Lei OJE 2024, Bilhaun US$ 1.95 Inklui Fundus RAEOA

DILI, STLNEWS.co – Proposta lei Orsamentu Jeral Estadu (OJE) ba 2024, montante los bilhaun US$ 1.8, konta mos ho fundu ba dezenvolvimentu Rejiaun Administrativu Espesial Oekusi Ambeno (RAEOA), milhaun US$ 80, hamutuk bilhaun US$ 1.95.

Visi Ministru Asuntu Parlamentar, Aderito Hugo hatete, IX Governu kuandu halo elaborasaun ba planu orsamentu 2024, hamosu senariu 4, husi planfon bilhaun US$ 1.6 too bilhaun US$ 1.9, tanba nee governu hahu ho servisu Komite Revizaun Orsamentu (KRO), halo elaborasaun ho lina ministerias, no entidade sira hotu, haree valor bilhaun US$ 1.6 iha elaborasaun KRO rezulta ba nesesidade hotu ministeriu ho entidade sira hotu sae too bilhaun US$ 1.8, nee montante alokadu.

“Enkuantu montante bilhaun US$ 1.95, nee inklui ho osan iha ona fundu dezenvolvimentu Oekusi nian, milhaun U$ 80, ho fundu seguransa sosial nian, tanba nee mak sae too bilhaun US$ 1.95, maibe montante lo-loos fora husi fundu sira mak bilhaun US$ 1.8”, informa Visi Ministru asuntu Parlamentar, Aderito Hugo ba jornalista iha edifisiu Komisaun Funsaun Publika (KFP) Kaikoli, Kuarta (22/11/2023).

Tuir nia, husi orsamentu nee foin aprova iha Konselhu Ministru, neebe governu aserta nia prioridade nafatin ba dispeza regular sira hanesan salariu no vensimentu, transferensia publika, neebe selu ba veteranus, idozus oan kiak faluk, seluk mak kapital dezenvolvimentu, kapital menor ba dispeza tinan ida nian.

Nia katak, nee foin proposta, maibe aguarda nafatin montante nee bainhira too iha PN iha debate bele mos tun ou bele mos sae, tanba PN iha knaar tomak atu desidi hamenus no aumenta.

Nia katak, atu submete orsamentu nee ba PN la too ona 24 Novembru, tanba iha Konselhu Ministru aprova ona, neebe posivel orsida lokraik ou bele mos aban, tanba nee atu ba ho karater urjensia ka normal, depois mak haree, bainhira dokumentus final sai mak bele pronunsia, tanba agora governu prepara ona dokumentus sira hodi hein atu submete ba PN.

Nunee mos Xefi Ezekutivu Kay Rala xanana Gusmao hatete, sira aprova ona orsamentu 2024, no sei prepara haruka ba PN, tanba nee fo hatene ona ba governantes sira katak, tinan mai sei lao haleu Timor, hodi haree planu neebe atu halo nee, halo duni ka lae, katak mai atu servi, laos atu simu osan sai ministru no ministra.

(jen)

LEAVE A REPLY

Please enter your comment!
Please enter your name here