DILI, STLNEWS.co – Redusaun ba impostu husi 5% ba 2.5% sei kontribui ba hamenus inflasaun, tuir previzaun ekonomista sei redus ba 2%, tanba nee povu kiik iha kbiit ba kompras.
Tuir Ekonomista João Gonsalves katak, apoia tebes desizaun governu hatun impostu, tanba aumenta impostu ho sira dehan menus reseitas, maibe tuir nia, hatun impostu mak kontribui ba hasae reseitas, tanba ema sei mai halo investimentu barak.
Tuir nia, hatun impostu nee bele redus inflasaun iha rai laran, maibe governu tenki kontrola diak espekulasaun ba presu iha merkadu.
“Hau nia previzaun, redus impostu sei kontribui ba redus inflasaun ba 2 %, atu dehan, benefísiu ba povu kbiit laek sira”, katak Ekonomista João Gonsalves ba STL Sesta (25/08/2023) iha Parlamentu Nasional.
Nia hatete, importante governu halo kontrolu, tanba iha produtu barak tama, tanba nee governu tenke kontrola, liu_liu mos ba sasan neebe hatama iha aplikasaun impostu 5%, no folin hatama selu impostu 2.5%, atu nunee emprezariu sira labele lakon sira nia osan.
Tanba sasan emprezariu sira hatama antes seidauk hatun impostu no hatama iha hatun ona impostu, nia folin lahanesan.
Maibe nia parte fiar, IX Governu iha kbiit no kapasidade atu kontrola, liu-liu ba emprezariu sira labele lakon sira nia osan.
Maibe importante mak tenki kontrola nasimu husi governu ba merkadu, tantu nasional no munisipiu sira hotu, nunee labele iha espekulasaun ba presu.
Nunee mos Xefi Bankada CNRT Duarte Nunes hatete, redus impostu, ida nee kontribui ba hatun inflasaun.
“Tanba hanesan ita akompana, taxa sae, sasan folin sae, sai preokupasaun boot ba povu, liu_liu povu neebe kbiit laiha atu kompras”, katak Duarte.
Tuir nia, konaba pursentu hira kontribui ba hatun inflasaun, ida nee, tanba nee mak governu hatun taxa importasaun husi 5% ba 2.5%, fiar katak ba oin sasan folin sei tun.
(gui)
