Reinu Unidu Kontinua Suporta TL Tama ASEAN

DILI, STLNEWS.co – Reinu Unidu kontinua suporta Timor Leste (TL) atu tama ba ASEAN, nomos iha setor edukasaun ba labarik no seluk tan.

Lia hirak nee hatoo husi Embaixador Reinu Unidu iha Timor-Leste, Owen Jenkins CMG ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Bairu Pite, Segunda nee (5/05/2023).

“Obrigadu barak, hau mak Embaixador Reinu Unidu iha Timor-Leste, Owen Jenkins CMG neebe iha oportunidade hasoru malu ho Prezidente Republika, ami mai hakarak hatoo ami nia vizaun oinsa suporta Timor Leste nia dezenvolvimentu oin mai liu-liu integrasaun Timor Leste nia iha ASEAN no area sira seluk neebe sei presiza suporta mos husi Reinu Unido nia ba Timor Leste,” katak nia.

Embaixador nee hatete, Reinu Unidu nia apoiu ba Timor Leste laos foin, maibe hahu kedas bainhira Timor Leste hetan indepedensia, nunee ba oin kontinua suporta nafatin.

“Iha hau nia misaun ikus nudar embaixador ba Timor Leste, katak Reinu Unidu kontinua suporta Timor Leste iha nia diplomatiku nee laos foin agora, maibe dezde Timor Leste ukun aan, nunee hakarak kontinua nafatin relasaun amigavel nee ho Timor Leste iha tempu oin mai iha setor saida deit neebe presiza,” katak nia.

Nia hatutan, ba oin Reinu Unidu sei suporta ba labarik sira, liga ho edukasaun ba labarik, hasae nutrisaun ba labarik sira, nunee mos kapasitasaun iha rekursu umanus iha Timor Leste.

Prezidente Republika Jose Ramos Horta mos aprezenta katak, iha Timor Leste numeru dezempregu sei aas iha Timor Leste, tanba nee husu atu embaixador mos buka ajuda mos ba ida nee.

Iha biban nee, Prezidente mos enkoraza ba Reinu Unidu atu ajuda nafatin Timor Leste liga ho demokrasia, tanba agora daudaun mos Timor Leste atu tama ona eleisaun no oin presiza relasaun amizade rai rua nee kontinua metin nafatin ho diak liu tan.

(eme)

LEAVE A REPLY

Please enter your comment!
Please enter your name here