DILI, STLNEWS.co – Ministru Interior (MI) Francisco Guterres hateten, tinan oin iha duni rekrutamentu ba membru Polisia Nasional Timor Leste (PNTL) foun, tanba nee MI no Komando Jeral PNTL sei halo analiza klean molok halo rekrutamentu.
Nia dehan, rekrutamentu nee importante, maibe tenki halo analiza klean, ho objetivu atu hatene servisu membru PNTL nian iha terenu, tanba tuir dadus neebe mak iha katak, membru PNTL halo servisu iha terenu ba ema nain 5.00.
“Hanesan hau dehan sei iha rekrutamentu, maibe hau seidauk bele temi numeru efetivu hira mak ita atu rekruta. Tanba nee ami sei hamutuk ho komando halo analiza konaba rasiu polisia ho komunidade,” hatete Ministru Interior (MI) Francisco Guterres ba jornalista sira iha Parlamentu Nasional, Kinta (24/08/2023).
Nia afirma, agora daudaun PNTL ida atende halo kontrolu ba komunidade hamutuk 500, tuir lo-loos labele, tenki hatun polisia ida atende ema 120.
Governante nee hateten, haree ba situasaun nee, Ministeriu Interior haree ona situasaun sira nee, atu koloka tan efetivu sira balun ba tan iha fronteira.
Iha fatin ketak, Segundu Komandante Jeral PNTL, Komisariu Polisia Pedro Belo, iha planu asaun anual tinan 2024 konaba rekrutamentu ba membru PNTL foun, sira tau hotu ba planu laran.
“Ita hotu hatene katak, hanesan parte politika nia koalia ona, rekrutamentu sei realiza iha tinan oin,” nia deklara.
Nunee mos Diretor Ezekutivu Fundasaun Mahein (FM), Nelson Martins esplika, FM konsidera daudaun nee governu menus rekursu kontribui ba movimentu ilegal iha fronteira, tanba PNTL tenki rekruta tan membru.
“Area fonterira nee luan tebes, depois ita menus ekipamentu, menus rekursu humanus, ida nee mos biban ba kriminozu sira nee bele asesu tama sai fasil, ida nee halo violasaun ba ita nia lei,” nia informa.
Nia hatutan, atu halo prevensaun ba atividade crossing ilegal iha fronteira presiza kria merkadu livre iha fronteira.
(jen)
