DILI, STLNEWS.co – Too oras nee seidauk iha enkontru semanal entre Primeiru Ministru (PM) Taur Matan Ruak ho Prezidente Republika (PR) Jose Ramos Horta, ida nee parlamentu konsidera relasaun orgaun soberanu la diak, bele fo mos impaktu ba estabilidade politika rai laran.
Tuir Deputadu husi Bankada FRETILIN, Jose Agustinho Somotcho katak, konaba ida nee kleur ona, nia hanoin dame tiha ona, maibe too ohin loron seidauk re-estabelese fali enkontru semanal entre PM ho PR, nia parte la hatene, maibe enkontru semanal nee hanesan obrigasaun ida husi PM, maibe PM laos mos hanesan kordenator ida, baihira PM la ba.
Situasaun real ema hotu hatene, ha nao ser que programa governu nian neebe presiza fo antesedensia ba PR konaba lei sira atu haree di-diak veta ka promulga karik laiha. Maibe ohin loron mos tempu kampanha PM lidera orgaun ezekutivu iha obrigasaun atu enkontru ho PR hodi hatoo pontus situasaun anivel nasional, seguransa, politika ba PR.
Tuir nia, nee primeira vez akontese laiha enkontru semanal entre PR ho PM, maibe orgaun soberanu sira iha koordena servisu, maski PR orgaun uniku pesoal, nudar orgaun masimu iha Timor konserteza tenki akompanha nafatin servisu governu nian, maibe too ohin loron desde que akontesimentu kazu balu iha rai laran.
“Ho buat sira nee hotu mak hamutuk mosu dezentendimentu too ohin loron, maibe tuir loos parte rua nee tenki iha enkontru semanal, se lae relasaun entre orgaun soberania la diak, bele iha mos impaktu ba estabilidade politika interna, nomos bele afeta ba seguransa,” katak Deputadu Jose Agustinho Xomotcho, ba STL Segunda nee (24/04/2023) iha PN.
Nia dehan, kazu balu akontese iha rai laran, tanba nee mak mosu dezentendimentu, maibe PR ho PM presiza hahu fali enkontru semanal, tanba bainhira PR komvoka reuniaun konselho superior ho konselho superior defeza seguransa no defeza PM sei hola parte.
Nunee mos Primeira Visi PN, Maria Angelina Sarmento katak, agora daudaun PM mos lisensa hela hodi halao atividade politika, liu-liu iha periodu kampanha eleitoral, neebe periodu ida nee governu hanesan ema politiku, tanba PN mak hahoris governu no PN mai husi bankada parlamentares mai husi partidu politiku, neebe depois de bankada parlamentar sira forma meza parlamenta, mak iha konstituisaun ba governu, neebe PM mos mai husi parpol.
Tuir visi Angelina katak, periodu agora PR laiha reuniaun regular ho PM, ida nee kestaun regular idak-idak nian, maibe nia hanoin sira iha rasik pozisaun no argumentu tanba saida mak laiha enkontru semanal.
“Tanba nee, hau lakohi atu komentariu liu ba kestaun terseiru orgaun soberanu ho primeiru orgaun soberanu nia politika”, katak nia.
(gui)
