DILI, STLNEWS.co – Oras nee daudaun IX Governu ho Parlamentu Nasional (PN) debate namanas hela ba programa periodu tinan 5, 2023-2028 remata, governu sei kontinua kedas submete Orsamentu Retifikativu ba PN.
Informa Visi Ministru Finansas Helder Lopes katak, preparasaun Orsamentu Retifikativu, depois reuniaun iha Ministériu Finansas semana kotuk, ministériu hotu hatama ona sira nia submisaun, se karik sira hakarak halo revizaun ba orsamentu orijinal agora.
Revizaun iha sentidu ida katak hakarak halo mudansa ou keta kontribui ba pakote ou espasu fiskal, nomos keta sira husu tan osan ruma karik, sira nia submisaun hatama ona mai Ministériu Finansas no tékniku Ministériu Finansas agora daudaun prepara hela.
“Ami mos servisu para asegura proposta orsamentu retifikativu, preparadu hodi submete ba Parlamentu Nasionál depois de apresiasaun ka debate ba programa IX”, informa Visi Ministru Finansas Helder Lopes, Kuarta nee (19/07/2023) iha parlamentu, bainhira partisipa iha debate programa IX Governu.
Tanba nee Helder dehan, preparasaun lao hela no finansas asegura hela, hein debate programa remata ka hetan aprovasaun iha Parlamentu Nasional, diskusaun ba organika governu nee iha ona, i kotinua kedas submete Orsamentu Retifikativu mai parlamentu.
(gui)
