DILI, STLNEWS.co – Reprezentante povu iha uma fukun Parlamentu Nasional (PN) preokupa ho resposta justisa nian ba iha matebian Bernado neebe mate iha sela Polisia Nasional Timor Leste (PNTL) ninia prosesu lentu, halo familia sira sei nafatin halerik hela ba iha justisa.
Tuir Xefi Bankada FRETILIN, Deputadu David Dias Ximenes hatete, kazu joven ida neebe mate iha sela PNTL nian too agora hamosu preokupa.
“Ita preokupa resposta justisa nian nee mak dehan prosesu lao hela, hau pesoalmente lamenta situasaun ida nee, purke vida nee laos ita idak-idak nian, maibe vida nee Maromak nian, agora se ita ho ita mak hasai vida maluk seluk nian nee lalos ona,” dehan nia ba STL iha PN, Segunda nee (03/04/2023).
Deputadu nee dehan, tanba nee lei sira neebe iha atu regula katak, iha sosiedade nia leet se mak viola lei tenki iha sansaun ba nia
Deputadu afirma, too ohin loron ita seidauk rona rezultadu husi parte investigasaun ninian, tanba ninia familia iha direitu atu hatene tuir evolusaun ka dezenvolvimentu investigasaun, ate agora familia vitima halo konferensia pers maibe seidauk iha resposta.
Deputadu nee konta, tauk mak ida hanesan Fredi Sambo ninian neebe iha Indonezia polisia mak oho, depois sira halo tun i halo sae para taka, maibe sorti ema nia familia espertu la fo ulun, tan sira halo autopsia foun-foun nee sira taka dalan, maibe familia sira nafatin ezije katak tenki reprezenta familia ida partisipa iha autopsai nee.
“Maibe la hatene ita nian iha nee oinsa, mais liga ba iha Fredi Sambo ida neebe Jeneral fitun 2 nee nian familia sira mak ezije hodi justisa bele sai no lori ba kastigu, hau tauk buat sira nee bele akontese fali iha ita nian rai, i hau hein katak la akontese,” sublinha Deputadu Mandati.
Nia akresenta, nudar ema kuandu haree buat sira nee senti tauk, agora ho ida neebe mate iha sela polisia nian, maibe agora familia vitima ho ema hotu hein hela ninia prosesu nee oinsa, no bainhira loos mak bele hatene, tanba liu fulan hira kedas ona.
(dom)
