DILI, STLNEWS.co – Representative World Food Programe (WFP) iha Timor-Leste hasoru Prezidente Parlamentu Nasional (PPN) Fernanda Lay, diskuti rezolve malnutrisaun inklui kongratula feto dahuluk sai PPN.
Tuir reprezentante World Food Programe (WFP) iha Timor-Leste, Alba Cecilia Garzon Olivares katak, iha audensia diskuti oinsa rezolve problema malnutrisaun iha Timor-Leste.
“Hau mai kongratula PPN Lay, hanesan feto dahuluk asumi knaar PPN iha Timor-Leste, iha oportunidade nee diskuti oinsa rezolve problema malnutrisaun,” informa Alba Cecilia Garzon Olivares ba jornalista sira hafoin ramata enkontru ho PPN iha PN, Kuarta (12/07/2023).
Nia dehan, WFP espresa nia apoiu ba programa hirak neebe governu implementa ona liga ho nutrisaun, seguransa alimentár no implikasaun husi projetu hirak implementa ona ba dezenvolvimentu nasional.
Laos nee deit, maibe sira diskuti buat barak, presiza hatene konaba stunting (málnutrisaun), tanba 47% malnutrisaun iha Timor-Leste, impaktu boot ba prosesu dezenvolvimentu nasional.
Tuir nia, labarik neebe mak sofre malnutrisaun, sira laiha dezenvovilmentu diak atu iha mudansa, tanba nee presiza rezolve problema malnutrisaun.
Nia esplika, atu rezolve presiza atividade hanesan hadia ka dezenvolve sistema aihan no asegura seguransa alimentár. Tanba fatór prinsipal kauza malnutrisaun mak pobreza, tanba ema barak laiha kapasidade sosa aihan nutritivu.
“WFP hakarak haree problema saida husi nutrisaun, hanesan sistema aihan, entaun ita implementa ona projetu, sistema aihán, hodi hametin sistema aihán iha Timor-Leste”, tenik nia.
Nia haktuir, sei servisu iha nivel lokal hodi apoiu governu lokal implementa atividade rezolve malnutrisaun. WFP servisu hamutuk ona ho Ministéiru Saúde (MS) iha programa alimentar, Ministéiru Edukasaun (ME) iha programa merenda eskolár, Ministéiru Solidariedade Sosiál no Inkluzaun (MSSI) iha programa bolsa da mãe, no servisu mos ho Ministéiru Agrikultura no Peska (MAP) konaba produsaun aihan.
Entretantu, iha enkonrtru Prezidente Parlamentu Nasionál Maria Fernanda Lay hatete, pozitivu tebes no prezidente konsiente konaba problema malnutrisaun no nia espresa interese hakarak servisu hamutuk ho WFP hodi rezolve problema malnutrisaun iha Timor-Leste.
(gui)
