Rogerio: Povu Sei Moris Iha Susar Nia Laran & Kampu Servisu Laiha

DILI, STLNEWS.co – Fundador FALINTIL, Rogerio Tiago Lobato hateten, maioria populasaun seidauk senti dezenvolvimentu iha rai laran, tanba ema barak sei moris iha susar nia laran no la iha kampu servisu, maski Timor Leste restaura independensia ba dala-21 ona.

Rogerio hatete, maioria povu seidauk senti dezenvolvimentu iha nasaun nee, tanba lider nasaun seidauk hamutuk, kontinua fila kotuk ba malu hodi prejudika ba iha dezenvolvimentu iha nasaun nee.

“Tinan 21 ita restaura ita nia independensia, maibe ita haree katak ema barak seidauk moris ho diak, joven barak tenki ba liur hodi buka moris, sira neebe buka moris iha rai laran mos dala ruma hetan deit US$ 1 no US$ 2 kada loron,” dehan Rogerio Lobato ba jornalista sira, bainhira partisipa iha komemorasaun proklamasaun independensia Timor-Leste ba dala-48 neebe realiza iha Palasiu Prezidensial Nicolau Lobato, Bairo Pite, Dili, Tersa nee (28/11/2023).

Nia hatutan, nasaun nee atu lao ba oin presiza lider sira nia hamutuk hodi fo hanoin malu atu lori dezenvolvimentu ba nasaun nee.

“Fukun lo-loos mak nee, ita seidauk hamutuk, luta kontra okupasaun no ita manan ona, maibe independensia ita la hamutuk, tanba ita haree problema barak iha rai laran, tanba sa mak ema sei oho malu? Indonezia mai oho ita la too sira sai tia, ita hela oho malu nafatin, entaun buat sira nee hotu kria instabilidade nunee impede investor internasional sira atu mai investe iha ita nia rain tanba ita nia instabilidade iha rai laran nee seidauk diak,” tenik nia.

Maibe eis Ministru Interior nee fiar ho mandatu IX Governu Konstitusional neebe lidera husi Primeiru Ministru Kay Rala Xanana sei buka solusaun hotu ba programa hirak neebe durante nee impede dezenvolvimentu iha nasaun nee.

(alb)

LEAVE A REPLY

Please enter your comment!
Please enter your name here