SEII Enkoraja Feto Kandidata Aan Ba Xefi Suku

DILI, STLNEWS.co – Sekretaria Estadu Igualdade no Inkluzaun (SEII) enkoraja feto pontensial atu kandidata aan ba Xefi Suku, ba eleisaun neebe sei halao iha fulan Outubru tinan nee.

Liafuan enkoraja nee hatoo husi SEII, Elivina Sousa katak, SEII nia misaun iha eleisaun suku agora kapasita feto maluk sira, enkoraja feto sira atu kandidata aan i halo akompanhamentu ba feto sira iha prosesu tomak.

“Atividade prinsipal rua SEII halo ona, hanesan atribui fundu ba Sosiedade Sivil, husi grupu feto prontu lidera, i halo transferensia ba asosiasaun feto potensial munisipiu, halo atividade formasaun, hasae kapasidade no hasae konhesimentu komunidade, tanba nee enkoraja feto kandidata aan”, katak nia ba jornalista bainhira hasoru malu iha Parlamentu Nasional, Kinta nee (07/09/2023).

Nia dehan, SEII nafatin enkoraja feto maluk sira hodi bele hetan mos konfiansa husi komunidade atu sai lider iha suku, agora daudaun prosesu lao hela, iha tempu badak sei haree mos finalidade ba atividade neebe SEII halo.

Nia afirma, laiha buat ida atu impede feto sira, kandidata aan, SEII hakarak rekomenda ba feto maluk sira, hakarak kandidata aan kandidata deit, tanba lei fo dalan, iha korajen ba feto sira.

Tuir nia, laiha kuota ba feto iha eleisaun suku, tanba nee eleisaun direta, maibe atu dehan katak, SEII konsiente numeru agora 5% feto iha suku nee kiik. SEII fiar ho atividade durante SEII halo no Sosiedade Sivil halo, hodi hasae konhesimentu no konsiensia publiku, katak feto iha direitu atu kandidata aan.

Tuir Elvina, durante nee suku husi feto sira mak lidera, sira iha responsabilidade boot, i fiar katak numeru feto kandidata ba suku sei aumenta, i feto sai xefi suku mos sei aumenta.

Nunee mos Deputada husi Bankada CNRT, Cedelizia Farria hatete, nia parte haree no rona informasaun katak, iha feto barak mak atu kandidata aan ba eleisaun suku agora.

Deputada nee hatete, hanesan feto, enkoraja feto maluk sira labele tauk ho ameasa oin-oin, liu-liu lideransa lokal sira balu hatete katak kultura la fo dalan atu feto kandidata aan, maibe haree ba iha Konstituisaun RDTL lei fo dalan ba feto.

Tanba TL opta sistema demokratiku fo direitu ba ema hotu bele kompete ba lideransa, tanba nee oportunidade ba maluk feto sira atu bele kandidata aan, tanba feto forti nasaun forti.

Tuir informasaun neebe STL asesu katak, eleisaun iha dia 18 Outubru 2023, no lista ikus ba kandidatu hatama dokumentus ka rejistu remata iha dia 13 Outubru, nunee iha loron 18 hahu halao eleisaun.

(gui)

LEAVE A REPLY

Please enter your comment!
Please enter your name here