DILI, STLNEWS.co – Sekretariu Estadu Peska (SEP) promete, durante nia mandatu sei dezenvolve diak liu tan setor peska iha Timor Leste.
“Maski servisu ida nee foun no todan tebes, maibe hau sei hakas aan durante hau nia mandatu, sei dezenvolve diak liu tan setor peska iha TL,” kestaun nee fo sai husi Sekretariu Estadu Peska (SEP), Domingos da Costa dos Santos, liu husi deskursu hafoin loron dahuluk servisu hanesan SEP iha Ministeriu agrikultura no Peska (MAP), Segunda (03/07/2023).
Nia afirma, servisu ida nee atu lao diak no susesu, mak presiza ema hotu nia kontribuisaun, tanba responsabilidade ida nee laos kabe ba ema ida nia aan, maibe ba nasaun nia diak.
“Tanba nee hau mesak labele, imi mesak labele, maibe presiza ita hotu nia servisu hamutuk, hodi dudu setor peska ba oin, redus ikan importasaun,” dehan SEP, Domingos da Costa dos Santos.
Iha fatin hanesan, Eis Ministru Agrikultura no Peska (MAP), Pedro dos Reis hateten, durante nia mandatu distribui ona ikan oan ba povu sira neebe mak hakarak hakiak ikan, tanba nee laos iha fatin ida rua deit, maibe kuaze munisipiu tomak nee hakiak ona ikan.
“Hau hanoin governu ida nee kontinua ho programa sira neebe iha, mak ba oin TL sei la importa tan ikan husi rai liur, ita bele konsumu deit ikan fresku neebe ita hakiak,” dehan eis ministru nee.
(mad)
