DILI, STLNEWS.co – Fulan hirak liu ba sai preokupasaun publiku konaba sidadaun Timor oan sai vitima ka abandona iha Portugal, hodi ba buka servisu, tanba nee Governu Timor-Leste ho Governu Portugal tenki iha komunikasaun diak ba malu, hodi buka solusaun.
Lia hirak nee hatoo husi Prezidente Parlamentu Nasional (PPN), Maria Fernanda Lay katak, iha vizita Xefi Ezekutivu Portugal mai Timor, koalia mos konaba mobilidade sidadaun, hanesan horikalan koalia iha Palasiu Nobre, maibe sei iha problema balu liga ba Nasaun Comunidade dos Países de Língua Portuguesa (CPLP), neebe ba mos sei aplay ba visa, tuir lo-loos mobilidade.
“Maibe Portugal presiza atensaun importante, tanba sira simu ema barak husi Afrika no Timor-Leste. Tanba nee, governu entre nasaun sira tenki koalia diak, hodi labele hasae fali numeru abandonadu sidadaun iha Portugal”, hatete Prezidente PN Maria Fernanda Lay ba jornalista sira iha PN, Kuarta (26/07/2023).
Entretantu, Xefi Bankada PD, Antonio da Conceição hatete, haree ba sidadaun sira neebe abandona iha Portugal, nee laos Portugal mesak atu rezolve, maibe Timor iha responsabilidade boot atu rezolve, muda lei.
Antonio hatete, nia nudar deputadu neebe tama prezidente grupu amizade ba Portugal ho Timor, neebe partisipa iha enkontru CPLP iha ona akordu ida ba mobilidade pesoas, katak sidadaun Timor ba nasaun 9, neebe tama iha CPLP livremente bele sirkula, ba no sira mai.
“Maibe Portugal bele fasilita ita mak autoriza ita hela iha Portugal, maibe laos hanesan iha Baukau ka Maubisi, tanba husi Timor ba nasaun seluk presiza pasaporte, surat lisensa, iha viza rezidensia”, katak Antonio.
Nia informa, Portugal mos muda ona lei iha tinan kotuk hodi bele ajusta, tanba Nasaun CPLP nia ema sira barak liu ba Portugal, tanba nee ajusta ho ida nee, nunee Timor bele livre tama ba Portugal.
Enkuantu atu hetan servisu laos Portugal nia responsabilidade ba Timor nia sidadaun, maibe nee Timor rasik mak responsabilidade, maibe Portugal permite Timor oan hela iha Portugal, hodi buka servisu.
Servisu iha vistu rezidensia no viztu trabalhu, tanba nee norma lao iha rai hotu, maibe Portugal vantajen boot ba Timor, tanba permite atu ba hela.
Entretantu jornalista sira hakarak konfirma kestaun nee ba iha Primeiru Ministru Portugal Antonio Costa, maibe tanba iha vizita Xefi Governu Portugal mai TL, laiha sesaun husu no hatan.
(gui)
