DILI, STLNEWS.co – Sekretariadu Teknik Administrasaun Estatal (STAE) sei la implementa Sentru Votasan Paralelu ba eleisaun parlamentar, tanba lei Prezidente Republika Timor-Leste, Jose Ramos Horta veta ona.
Hatete Diretor Jeral STAE, Acilino Manuel Branco ba jornalista sira iha salaun STAE Kaikoli, Dili, Tersa nee (18/04/2023).
“Hau husu ba publiku tomak, eleisaun parlamentar mai nee ita sei la implementa sentru votasan paralelu,” nia hatete.
Nia dehan, iha balun hanoin katak, iha eleisaun presidensial implementa paralelu, maibe eleisaun parlamentar laiha senrtu votasan paralelu, tanba iha eleisaun presidensial iha nia lei rasik.
Nia esplika, bainhira lei eleisaun presidensial hotu ona, lei eleisaun prezidensial labele uza fali ba eleisaun parlamentar, tanba iha kada eleisaun iha ninia lei rasik.
“Iha eleisaun prezidensial ita implementa sentru votasan paralelu, maibe iha eleisaun parlamentar propoin atu implementa sentru votasaun paralelu, tama mos iha alterasan lei neebe PR veta ona,” nia tenik.
Tanba nee, STAE laiha kompetensia, STAE laiha fudamentu legal ruma atu buka mekanizmu ou medida ruma atu bele akomoda preokupasaun neebe iha, tanba STAE hanesan tekniku halo deit saida mak Lei hatete.
Nia informa, STAE hanesan orgaun eleitoral ida neebe administra prosesu sira hotu-hotu, la halo desizaun ruma, neebe ninia fundamentu legal nee laiha. Tanba nee, saida deit mak STAE jere no STAE disidi, nee ho baze lei no regulamentu neebe aprova husi dikreitu lei husi governu sira.
Nia hatutan, iha artigu 37, Lei numeru 6/2006 ba kuarta aletra Lei numeru 9/2017 artigu 37 pontu 5 neeba nee hatete, Forsa de Segurasa, F-FDTL, PNTL, fiskais sira, funsionariu publiku maka bele vota deit iha fatin neebe sira halao sira nia knar ba, maibe la temi jornalista sira.
“Hau atu dehan deit katak, STAE orgaun ida neebe ho profisionalizmu, halao ninia knaar ho imprasialdade, kompri deit saida mak hatete iha lei, i la politiza sasan,” nia koalia.
Nia deklara, STAE tenki reponsabiliza aktus sira aban bairua, prosesu tomak neebe lao mai nee nunka komete infrasaun, komete iregular ruma, neebe mak komprova husi Tribunal Rekurus ninia ultima prosesu, katak prosesu lao diak tebes.
Iha fatin hanesan, Akademista UNTL Jose da Costa Belo hatete, lo-loos nee Prezidente Republika labele veta lei nee, tanba lei mak fo dalan ba sidadaun sira asesu ba sentru votasan paralelu, hanesan Timor oan sira iha Australia, UK, Koreia sira nee bele vota, liu-liu jornalista sira neebe halao knaar iha fatin-fatin.
“STAE koalia los, tanba lei neebe iha eleisaun presidensia labele lori fali mai eleisaun parlamentar, tanba nee tuir lo-loos ita nia PR tenki promulga lei nee, laos ba veta fali, veta entaun sidadaun barak mak la tuir vota,” nia deklara.
Nunee mos Ema ho Difisiensia Janico da Silva informa, Ema ho Defisiensia sira nia votus kontinua la segredu, tanba lei PR veta, tanba nee husu ba PR tenki deklara lo-loos tanba saida mak veta lei nee.
(jen)
