DILI, STLNEWS.co – IX Governu Konstituisional submete Orsamentu Jeral Estadu (OJE) 2024 iha dia 24 Novembru, se pedidu ho karakter normal mak impaktu ba diskusaun, tanba tuir rejimentu Parlamentu Nasional (PN) tenki uza tempu 45 dias, signifika diskusaun bele too Janeiru no posibilidade tenki uza duodésimu.
Prezidente Komisaun C trata asuntu Finansa Publika, Deputada Cedeliza dos Santos hatete, lei OR neebe mak foin aprova hatete, laos governu tenki submete OJE 2024 nian inisiu do ano iha dia 15 Outubru tuir lei neebe mak hatete, maibe dehan dentru fulan 5 sura husi simu pose neebe iha dia 1 Julhu, entaun dentru fulan lima nee monu iha dia 1 Dezembru. Maibe se governu submete proposta orsamentu 2024 iha dia 24 Novembru, entaun nee kumpri hela lei.
“Agora dehan tempu too ga lae ba Parlamentu Nasional (PN), maibe ami seidauk hatene governu submete OJE 2024 mai PN ho pedidu urjensia ka pedidu normal, se pedidu urjensia entaun tempu iha 30 dias, tanba ami komisaun C halo tiha ona kalendariu tentativu, se governu submete mai ho pedidu urjensia mak, too dia 20 Dezembru ami bele submete ona ba PR hodi halo promulgasaun, entaun signifika 2024 dia 1 Janeiru ita la presiza uza osan duodésimu. Maibe karik nia mai ho pedidu normal, entaun tuir rejimentu tenki uza tempu 45 dias, se mai ho pedidu normal nee impaktu duni ba iha diskusaun, tanba ita nia diskusaun bele too Janeiru no posibilidade tenki uza duodésimu,” dehan nia ba jornalista sira iha PN, Sesta (10/11/2023).
Kontinua ba pajina 2
Nia tenik, maibe laiha problema, tanba IX Governu nee governu foun, nia bele hatama ho pedidu urjensia, PN sei jere tempu no husi Komisaun C nia kalendariu bele kobre hela tempu sira nee tomak.
Nia sublina, konaba Lei Enkuandramentu Orsamental (LEO) sei la halo alterasaun, tanba iha OR foin lalais halo tiha ona alterasaun ba lei 3 hanesan LEO, OJE 2023 nomos ba lei tributaria nian, nunee tuir komunikasaun husi PN ho governu katak, governu sei la submete tan ona atu halo alterasaun tan ba lei LEO, submete mai agora mak proposta OJE 2024 nian deit.
(dom)
